ՀՀ քննչական կոմիտեի Երեւան քաղաքի քննչական վարչության Արաբկիր վարչական շրջանի քննչական բաժնում՝ Երեւանում գործող սուպերմարկետում զենքի գործադրմամբ ավազակային հարձակման դեպքի առթիվ քննվող քրեական գործով իրականացված քննչական գործողությունների արդյունքում պարզվել է ենթադրյալ հանցագործություն կատարած անձի ինքնությունը: ՀՀ քննչական կոմիտեի դեպարտամենտի տեղեկատվության եւ հասարակայնության հետ կապերի բաժնից հայտնում են, որ ձեռք բերված ապացույցների հիման վրա՝ վերջինիս մեղադրանք է առաջադրվել: Նախնական տվյալներով՝ 2019 թվականի հունվարի 17-ին` ժամը 02:40-ի սահմաններում, ենթադրյալ հանցագործություն կատարած անձը ուրիշի գույքի հափշտակություն կատարելու դիտավորությամբ մուտք է գործել Երեւան քաղաքի Բաղրամյան փողոցում գործող սուպերմարկետ, որտեղ ի ցույց դնելով իր մոտ առկա ատրճանակը, ինչպես նաեւ սպառնալով պայթեցնել իր մոտ գտնվող պայթուցիկ սարքը,սուպերմարկետի աշխատակիցների կյանքի եւ առողջության համար վտանգավոր բռնություն գործադրելու սպառնալիքով՝ պահանջել է իրեն հանձնել դրամարկղում առկա ողջ գումարը, սակայն մի քանի րոպե անց դիմել է փախուստի՝ առանց որեւէ բան հափշտակելու: Դեպքի առթիվ 2019 թվականի հունվարի 17-ին Արաբկիր վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 4-րդ կետով: Կատարվել է դեպքի վայրի զննություն, առգրավվել են նշված սուպերմարկետում գործող տեսախցիկների տեսագրառումները, հարցաքննվել վկաներ: Քրեական գործով իրականացված քննչական եւ դատավարական այլ գործողությունների արդյունքում պարզվել են դեպքի մի շարք հանգամանքներ, ենթադրյալ հանցագործություն կատարած անձի ինքնությունը, ով Երեւան քաղաքի բնակիչ է՝ ծնված 1999 թվականին: 2019թ. հունվարի 20-ին վերջինս ձերբակալվել է՝ զենքի գործադրմամբ ավազակային հարձակում կատարելու կասկածանքով: Ձեռք բերված ապացույցների համակցությամբ՝ 20-ամյա երիտասարդին մեղադրանք է առաջադրվել՝ ՀՀ քրեական օրենսգրքի 175-րդ հոդվածի 2-րդ մասի 2-րդ եւ 4-րդ կետեորվ: Նրա նկատմամբ որպես խափանման միջոց է ընտրվել կալանավորումը: Նախաքննությունը շարունակվում է: