Մարտի 1-ի գործով քննչական խմբի նախկին ղեկավար, նույն գործով որպես մեղադրյալ ներգրավված Վահագն Հարությունյանի պաշտպան Միհրան Պողոսյանը դատավոր Արտուշ Գաբրիելյանի դեմ կարգապահական վարույթ հարուցելու միջնորդություն է ներկայացրել: Գաբրիելյանը օրեր առաջ առանց պաշտպանական կողմի ներկայության քննել էր Վահագն Հարությունյանին կալանավորելու նախաքննական մարմնի կողմից ներկայացված միջնորդությունը եւ բավարարել այն: Հարությունյանի պաշտպան Միհրան Պողոսյանն այս առնչությամբ ֆեյսբուքյան իր էջում հետեւյալ գրառումն է կատարել. «Երևան քաղաքի ընդհանուր իրավասության դատարանի դատավոր Արտուշ Գաբրիելյանի կողմից Վահագն Հարությունյանի նկատմամբ կալանավորումը որպես խափանման միջոց կիրառելու գործով «արդարադատություն» իրականացնելիս թույլ տրված քրեադատավարական օրենքների նորմերի ակնհայտ և կոպիտ խախտումներ հիմքով այսօր Դատավորների ընդհանուր ժողովի կարգապահական հարցերի հանձնաժողովին եմ ներկայացրել կարգապահական վարույթ հարուցելու և կարգապահական պատասխանատվության ենթարկելու միջնորդությամբ բարձրագույն դատական խորհրդին դիմելու մասին հաղորդում։ Հ.Գ. Դատական համակարգ ունենալու համար առաջին հերթին պետք է ազատվել նման տիպի չագուչով ու պատմուճանով անձանցից, ովքեր կարող են 26.12.2018թ-ին նույն գործով նույն անձի վերաբերյալ պաշտպանի կողմից ներկայացված բողոքը քննել պաշտպանի մասնակցությամբ, իսկ 30.12.2018 «հանկարծակի» մոռանալ պաշտպանի գոյության մասին և խափանման միջոցի մասին միջնորդությունը քննել նույն պաշտպանի բացակայությամբ...»: