Երեւանի ավագանու արտահերթ ընտրությունները տեղի կունենան սեպտեմբերի 23-ին: Երեւանի ավագանու ընտրություններին մասնակցելու համար հայտերի ընդունման վերջնաժամկետը սեպտեմբերի 3-ն է, ինչ վերաբերում է քարոզարշավին, ապա այն կմեկնարկի սեպտեմբերի 10-ին եւ կավարտվի սեպտեմբերի 21-ին: Երեւանի քաղաքապետ դառնալու ցանկություն այս պահին հայտնել է 9-ը թեկնածու։ Irakanum.am-ը ներկայացնում է թեկնածուներին։ «Քաղաքացիական պայմանագիր» կուսակցության ցուցակը գլխավորելու է հեղափոխությունից հետո այդ կուսակցությանն անդամակցած դերասան Հայկ Մարությանը։ ԲՀԿ-ի ցուցակը գլխավորելու է ԱԺ պատգամավոր Նաիրա Զոհրաբյանը։ Նա մասնագիտությամբ լրագրող է։ «Երկիր Ծիրանի» կուսակցությունը քաղաքապետի պաշտոնում առաջադրելու է կուսակցության ղեկավար Զարուհի Փաստանջյանը։ ԵԼՔ-ի (կազմված Լուսավոր Հայաստան եւ Հանրապետություն կուսակցություններից) թեկնածուն արդարադատության նախարար Արտակ Զեյնալյանն է: «Երեւանի հանրություն» նախաձեռնությունը եւ «ԳԱԼԱ» կուսակցությանը Երեւանի քաղաքապետի թեկնածու են առաջադրելու ճարտարապետ Անահիտ Թարխանյանին: Վերջինս Անդրեաս Ղուկասյանի կինն է։ Չնայած այն հանգամանքին, որ Ղուկասյանը «Հայ կառուցողական» կուսակցության նախագահն է, սակայն կինը առաջադրվում է այլ կուսակցությունով։ «Ժառանգություն» կուսակցության հիմնադիր Րաֆֆի Հովհաննիսյանը եւս հայտարարել է, որ մասնակցելու է քաղաքապետի ընտրություններին: «Ժողովրդական ուղի» կուսակցության թեկնածուն Մանուել Գասպարյանն է։ Նորաստեղծ «Ռեֆորմիստներ» կուսակցության քաղաքապետի թեկնածուն կինոռեժիսոր Արտակ Ավետյանն է: «Հայոց համազգային շարժման» ավագանիների թեկնածուների ցանկն էլ գլխավորելու է պատգամավոր Արարատ Զուրաբյանը: ՀՀԿ-ն, ամենայն հավանականությամբ, չի մասնակցի քաղաքապետի ընտրություններին, ՀՅԴ-ից ցանկություն ունեն, բայց դեռ թեկնածուների մասին չեն խոսում, իսկ ՀԱԿ-ը պաշտոնապես հայտարարել է, որ չի մասնակցելու: