00:00:00

Իրանի հայերն ունեն մյուս քաղաքացիներին հավասար իրավունքներ. Իրանի Գերագույն դատարանի նախագահ

23:23, 18 նոյեմբեր 2026 Արտաքին քաղաքականություն

 

 

Իրանի Գերագույն դատարանի նախագահ Մոհամմադ Ջաֆար Մոնթազերին հայտարարել է, որ իրանահայերը քաղաքացիական իրավունքների առումով որևէ տարբերություն չունեն մյուս քաղաքացիների հետ, իսկ նրանց անձնական և ընտանեկան հարցերը կարգավորվում են իրենց կրոնական օրենքներին և կանոնակարգերին համապատասխան, գրում է parstoday.ir-ը: 

«Մեհր» գործակալության հաղորդմամբ՝ Մոհամմադ Ջաֆար Մոնթազերին այս մասին հայտարարել է Հայաստանի Քննչական կոմիտեի պաշտոնական պատվիրակության հետ հանդիպման ընթացքում։ Անդրադառնալով երկու երկրների պատմական կապերին և մշակութային ընդհանրություններին, նա ընդգծել է Թեհրանի և Երևանի միջև իրավական ու դատական ոլորտներում համագործակցության ամրապնդման անհրաժեշտությունը։
Հանդիպմանը Հայաստանի Քննչական կոմիտեի նախագահ Արթուր Պողոսյանն իր հերթին կարևորել է Իրանի քաղաքացիների իրավունքների պաշտպանությունը Հայաստանում։ Նրա խոսքով՝ համապատասխան մարմիններին հանձնարարվել է Իրանի քաղաքացիների մասնակցությամբ քրեական գործերի քննությունն իրականացնել առանձնահատուկ թափանցիկությամբ, ինչպես նաև հնարավորության սահմաններում խուսափել նրանց կալանավորումից և գույքի արգելադրումից։

Պողոսյանը հայտնել է նաև, որ բացահայտվել է խարդախության խոշոր գործ, որի տուժածների թվում եղել են Իրանի քաղաքացիներ։ Նրա խոսքով՝ կողմերը նախնական համաձայնության են եկել դատական համագործակցության մասին փոխըմբռնման հուշագրի մշակման, տեղեկատվության և փորձի փոխանակման, ինչպես նաև համատեղ վերապատրաստման դասընթացների կազմակերպման շուրջ։

Հանդիպման ընթացքում քննարկվել են նաև նորագույն տեխնոլոգիաների և արհեստական բանականության կիրառման, ինչպես նաև երկու երկրների քաղաքացիների տնտեսական գործունեությանը խոչընդոտող իրավական ու տնտեսական խնդիրների վերացման հարցերը։

Լրահոս

Արխիվ

March 2017
Երկ ԵրքՉոր Հնգ Ուրբ Շաբ Կիր