Ռուսաստանի Պաշտպանության նախարարությունը հայտնել է Ուկրաինայի ԶՈւ–ի ապահովման համար օգտագործվող լոգիստիկ ենթակառուցվածքների մի քանի օբյեկտների հարվածներ հասցնելու մասին, որոնց թվում է նաև «Յուժնի» նավահանգստում ռազմական բեռով նավը, տեղեկացնում են ռուսական ԶԼՄ-ները:
Նշվում է, որ, ըստ ՌԴ ՊՆ–ի, ռուսական զորքը շարունակում է խմբային հարվածներ հասցնել Ուկրաինայի լոգիստիկ օբյեկտներին և Ուկրաինայի զինված ուժերին սպասարկող նավերին։
Մասնավորապես, «Յուժնի» նավահանգստում հարված է հասցվել բեռնանավի։ ՌԴ ՊՆ–ն պնդում է, որ նավի վրա ուկրաինական զորքերի համար նախատեսված ռազմական գույք է եղել։
Հարված է հասցվել նաև Օդեսայի մարզի Ներուբայսկոյե բնակավայրի լոգիստիկ կենտրոնին։ ՌԴ ՊՆ–ի տվյալներով՝ օբյեկտն օգտագործվել է Օդեսայի նավահանգստով ժամանող ռազմական բեռների պահեստավորման և հետագա բաշխման համար։
Ռուսական գերատեսչությունը հայտնել է նաև Կիևի մարզում երկու լոգիստիկ օբյեկտների խոցման մասին։ Հարվածային անօդաչուները հարձակվել են Պոգրեբի բնակավայրում գտնվող «DHL լոգիստիկ» կենտրոնի վրա։
Ըստ ՌԴ ՊՆ–ի՝ կենտրոնի պահեստներն օգտագործվել են տարբեր նշանակության անօդաչուների և դրանց բաղադրիչների պահման համար։
Հաղորդվում է նաև, որ Բորիսպոլում խոցվել է «Զամմլեր սկլադ» առևտրալոգիստիկ կենտրոնը, որն օգտագործվել է Ուկրաինայի զինված ուժերին արևմտյան երկրների կողմից մատակարարվող ռազմական բեռների պահեստավորման և բաշխման համար։
