Կիևի մարզի Միլա գյուղում տեղակայված պահեստների վրա օգոստոսի 28-ի երեկոյան Ռուսաստանի կողմից հասցված հարվածի հետևանքով զոհերի թիվը հասել է 37-ի։ «Արմենպրես»-ի հաղորդմամբ՝ այս մասին հայտնում է РБК-Украина-ն՝ հղում անելով Կիևի մարզային ռազմական վարչակազմի ղեկավար Տիմուր Տկաչենկոյի հայտարարությանը։«Ցավոք, Բուչա շրջանում զոհերի թիվը հասել է 37-ի։ Սարսափելի և անդառնալի կորուստ։ Մեր անկեղծ ցավակցությունները զոհերի ընտանիքներին և ընկերներին»,- ասել է Տկաչենկոն։
Նրա խոսքով՝ հրդեհի մեկուսացման աշխատանքները շարունակվում են։ Փրկարարները և բոլոր ծառայությունները շարունակում են աշխատել ողբերգության վայրում։ Օգոստոսի 28-ի երեկոյան ռուսական անօդաչու թռչող սարքերը հարվածել են Կիևի մարզի Բուչա շրջանում գտնվող պահեստներին։ Հրդեհը ուղեկցվել է պայթյուններով, որոնք շարունակվում են նույնիսկ այսօրվա ընթացքում։ Կան նաև վիրավորներ։37 զոհվածների թվում է Դմիտրիևկա համայնքի ղեկավար Տարաս Դիդիչը։ Վնասվել են նաև բնակելի շենքերը և պանսիոնատը, և իրականացվում են զանգվածային տարհանումներ։
Մեծածավալ հրդեհի պատճառով ժամանակավորապես փակվել է M-06 Կիև-Չոպ մայրուղու 15-րդ կիլոմետրից մինչև 32-րդ կիլոմետր հատվածի երթևեկությունը։ Երթևեկությունն այս պահին որոշակի սահմանափակումներով վերականգնվել է։
Նշվում է, որ Ուկրաինայի դատախազությունը հետաքննություն է սկսել՝ պարզելու համար բնակելի շենքերին մոտ պայթյունավտանգ իրեր պահելու օրինաչափությունը։Կիևի մարզում օգոստոսի 30-ը սգո օր է հայտարարվել։
