ԱՄՆ ֆինանսների նախարար Սքոթ Բեսենթը սպառնացել է ամերիկյան ֆինանսական համակարգից հեռացնել այն կազմակերպություններին, որոնք օգնում են Իրանին «փողերի լվացման» հարցում՝ ընդգծելով, որ Վաշինգտոնը մտադիր է Թեհրանին զրկել համաշխարհային ֆինանսական համակարգի առանցքային մեխանիզմներից օգտվելու հնարավորությունից։
«Թույլ տվեք հստակ ասել․ ցանկացած կազմակերպություն, որը նպաստում է Իրանի շահերից բխող փողերի լվացմանը, կհեռացվի ԱՄՆ դոլարային համակարգից։ Հետհաշվարկն արդեն սկսվել է», — երկուշաբթի օրը նախապես պատրաստված ելույթի ժամանակ հայտարարել է Բեսենթը։
Պատասխանելով պատժամիջոցների մասին հարցին՝ ֆինանսների նախարարը զգուշացրել է, որ թիրախում կհայտնվեն այն կառույցները, որոնք օգնում են Իրանին նավթի արտահանումից ստացվող եկամուտները վերածել ֆինանսական ռեսուրսների, որոնք օգտագործվում են «ռեժիմի» կողմից։
«Եթե նրանք նպաստում են նման գործարքների իրականացմանը և էկոհամակարգի մաս են կազմում, որը իրանական նավթը վերածում է փողի, իսկ այդ փողը՝ ճնշումների գործիքի, ապա նրանք կդառնան պատժամիջոցների թիրախ», — հայտարարել է Բեսենթը։
Հարցին, թե արդյոք չինական բանկերը կարող են բախվել երկրորդային պատժամիջոցների՝ Իրանին ենթադրյալ աջակցություն ցուցաբերելու պատճառով, Բեսենթը պատասխանել է, որ ամենաարդյունավետ մոտեցումը համարում է «լուռ դիվանագիտությունը»։
Միաժամանակ նախարարը ընդգծել է․ «Ոչ ոք ամերիկյան պատժամիջոցների հասանելիությունից դուրս չէ»։
