Նորվեգիայում ավիադիսպետչերների գործադուլի պատճառով կիրակի օրը չեղարկվել է 147 չվերթ, իսկ ուղևորներին զգուշացրել են ողջ օրվա ընթացքում հնարավոր զգալի ուշացումների և նոր չեղարկումների մասին, հայտնում է NRK-ն։

Ամենից շատ տուժել է Օսլո-Գարդերմուեն օդանավակայանը, որտեղ չեղարկվել է 75 մեկնում և 47 ժամանում։ Խնդիրները կազդեն երկրի ողջ տարածքի օդանավակայանների վրա։

Պատճառը Օսլոյի օդանավակայանի շուրջ օդային տարածքի ամբողջական փակումն էր կանոնավոր ավիահաղորդակցության համար՝ 06:30-ից մինչև 11:30-ը։ Avinor-ի տվյալներով, դրա պատճառով միայն Norwegian ավիաընկերությունը ստիպված է եղել չեղարկել 72 չվերթ, ինչն անդրադարձել է մոտ 9 հազար ուղևորի վրա։

Ավիադիսպետչերների գործադուլը սկսվել է ուրբաթ օրը՝ 11:00-ին։ Դրան մասնակցում են 12 դիսպետչերներ Օսլո-Գարդերմուեն և Բերգեն-Ֆլեսլանդ օդանավակայաններում։ Շաբաթ օրը երկրի արևմտյան մասի օդային տարածքը նույնպես փակվել էր կանոնավոր չվերթների համար ավելի քան երեք ժամով։ Այդ ընթացքում թույլատրվում էր իրականացնել միայն առաջնահերթ թռիչքներ, ներառյալ սանիտարական ավիացիան, ոստիկանական ուղղաթիռները և Զինված ուժերի չվերթները։

Խափանումների պատճառով հարյուրավոր ուղևորներ ստիպված են եղել գիշերել Բերգենի օդանավակայանում։

Գործադուլը շարունակվում է, և երեքշաբթիից սպասվում է դրա ընդլայնումը․ նախատեսվում է դրան կմիանա ևս ութ ավիադիսպետչեր։ Սա կարող է հանգեցնել նոր չեղարկումների և չվերթների ուշացումների։