Ֆրանսիայի նախագահ Էմանուել Մակրոնը հայտարարել է, որ առաջիկա շաբաթներին Ուկրաինային կմատակարարվեն հակաօդային պաշտպանության համակարգեր և հրթիռներ, գրում է Reuters լրատվական գործակալությունը։

Հայտարարությունը հնչել է 2026 թվականի հուլիսի 13-ին Փարիզում՝ Ուկրաինային աջակցող «Կամավորների կոալիցիայի» հանդիպումից հետո։

Մակրոնի խոսքով՝ Ֆրանսիան և Ուկրաինան համաձայնեցրել են երկկողմ պաշտպանական համագործակցության հետագա քայլերի ճանապարհային քարտեզը՝ շարունակելով ավելի վաղ ձեռք բերված պայմանավորվածությունների իրականացումը։

Ֆրանսիայի նախագահը նշել է, որ Ուկրաինան ձեռք կբերի նոր սերնդի SAMP/T հակաօդային պաշտպանության համակարգերի առաջին խմբաքանակը։

Նրա խոսքով՝ դրանք կլրացնեն այն ՀՕՊ համակարգերն ու հրթիռները, որոնք նախատեսվում է Ուկրաինային մատակարարել առաջիկա շաբաթների ընթացքում։

Միաժամանակ Փարիզում կայացած հանդիպման ընթացքում Ուկրաինան և եվրոպական ինը երկրներ հայտարարել են միասնական հակաբալիստիկ պաշտպանության կոալիցիա ստեղծելու մասին։ Նոր նախաձեռնության նպատակն է ձևավորել Եվրոպայի միասնական պաշտպանական համակարգ՝ բալիստիկ հրթիռների սպառնալիքին դիմակայելու համար։

Ֆրանսիան և արևմտյան մյուս գործընկերները պատրաստվում են նաև մեծացնել Ուկրաինային տրամադրվող հակաօդային պաշտպանության միջոցների ծավալը՝ ռուսական հրթիռային և անօդաչու հարձակումների շարունակման պայմաններում։