Իրանի շուրջ ռազմական լարվածության աճի ֆոնին Հայաստանի երկրորդ նախագահ Ռոբերտ Քոչարյանը «Մեծ քաղաքականություն» փոդքասթում բացահայտել է հանրապետության անվտանգության համար առաջացող հիմնարար սպառնալիքները։
Նրա գնահատմամբ, իշխանությունների արձագանքը հարևան երկրում տեղի ունեցող իրադարձություններին եղել է անընդունելի, և վարչապետի վարքագիծը կարելի է բնութագրել որպես «պոզերություն»։ Քոչարյանի խոսքով՝ ԱՄՆ-ի և Իսրայելի գլխավոր նպատակներից է էթնիկ փոքրամասնություններին Իրանի իշխանության դեմ հանելը։ «Իրանում էթնիկ հողի վրա խմորումները. 17-20 մլն ադրբեջանցիներ և այլ ազգություններ, սա ուղղակի գոյաբանական սպառնալիք է Հայաստանի համար», - ընդգծել է նա։ Այս պայմաններում չափազանց վտանգավոր է Ադրբեջանի՝ հակամարտությանը միանալու հեռանկարը, ինչը Հայաստանին կդարձնի ոչ թե դիտորդ, այլ անմիջական մասնակից։ Առանձնակի մտահոգություն է հայտնել Քոչարյանը հայ-ամերիկյան ռազմավարական համագործակցության զարգացման կոնտեքստում։
Նա հիշեցրել է, որ դեռ հինգ տարի առաջ «Թրամփի միջանցքի» ծրագրի իրականացման դեպքում Հայաստանը կդառնար Իրանի դեմ հետախուզական գործողությունների կենտրոն։ Այսօր այդ վտանգը նոր որակ է ստանում, քանի որ Երևանում է գտնվում աշխարհի խոշորագույն ամերիկյան դեսպանատներից մեկը, որի գործունեության զգալի մասը, ըստ էության, կարող է ուղղված լինել Իրանի դեմ հետախուզությանը։ Սա ստեղծում է ուղղակի ռազմական սպառնալիք. Իրանի հետ լայնամասշտաբ պատերազմի դեպքում Հայաստանի տարածքը և ենթակառուցվածքները կարող են դիտարկվել որպես օրինական թիրախ՝ ի պատասխան այդ ակտիվության:
