Ռուսաստանի և Հայաստանի միջև երկխոսությունը կանոնավոր է և տեղի է ունենում բոլոր մակարդակներում, այդ թվում՝ նաև երկու երկրների ղեկավարների և ռուս-հայաստանյան միջկառավարական և միջխորհրդարանական հանձնաժողովների ներկայացուցիչների միջև։ Այս մասին այսօր ՀՀ խորհրդարանի խոսնակ Ալեն Սիմոնյանի հետ տարածաշրջանների պալատում անցկացված հանդիպումից հետո լրագրողների հետ զրույցում ասել է Դաշնության խորհրդի խոսնակ Վալենտինա Մատվիենկոն, տեղեկացնում է Парламентская газета-ն։
Նա, մասնավորապես, նշել է. «Ռուսաստանի և Հայաստանի միջև համագործակցությունը շատ բազմակողմանի է, տեղի է ունենում լայն շրջանակում։ Եվ խորհրդարանի դերը որպես միջպետական հարաբերությունների կարևոր բաղադրիչ, անկասկած, նշանակալի է փոխգործակցության նման ինտենսիվ մակարդակում»:
Մատվիենկոն նաև հայտնել է, որ հանդիպման ժամանակ երկկողմ հարցերի լայն շրջանակ է քննարկվել։
«Ըստ իս՝ զրույցը կառուցողական էր, անկեղծ էր, երբեմն՝ թեժ և բանավիճային, սակայն ընդհանուր առմամբ՝ կառուցողական և արդյունավետ։ Մենք կանոնավոր կապ ենք պահպանում և կարծիքներ փոխանակում»,-ասել է Դաշնության խորհրդի խոսնակը։
Հաղորդվում է նաև, որ Մատվիենկոն շնորհակալություն է հայտնել Սիմոնյանին ԱՊՀ միջխորհրդարանական վեհաժողովի աշխատանքներին ակտիվ մասնակցության համար և կարծիք հայտնել, որ փետրվարի 5-ի հանդիպմանը քննարկված հարցերը կհանգեցնեն «համապատասխան արձագանքի» օրենսդրական հարթակում։
«Մեր երկրների միջև խորհրդարանական մակարդակով մի շարք չլուծված աշխատանքային հարցեր կան։ Մենք, իհարկե, կխրախուսենք գործադիր իշխանություններին ավելի արագ լուծել այդ հարցերը»,-ասել է նա։
Մատվիենկոն անդրադարձել է նաև ապագա ծրագրերին: Այս համատեքստում նա ընդգծել է Ռուսաստան-Հայաստան միջխորհրդարանական հանձնաժողովի գերազանց աշխատանքը, որի հաջորդ նիստը տեղի կունենա 2026 թվականի մարտին։
«Խորհրդարանական փոխգործակցությունը և բաց խորհրդարանական երկխոսությունը մեր երկրների միջև դաշնակցային հարաբերությունների շատ կարևոր բաղադրիչ են»,-ասել է Մատվիենկոն:
