Հունվարի 13-ին Բելգիայի Ներկայացուցիչների պալատի նախագահ Պետեր դը Ռուվերն ընդունել է դեսպան Տիգրան Բալայանին։ Այս մասին տեղեկացնում են Բելգիայում ՀՀ դեսպանությունից:
Հանդիպման ընթացքում քննարկվել են Հայաստան-Բելգիա երկկողմ հարաբերությունների զարգացման ուղղությամբ ձեռնարկվող քայլերը, միջխորհրդարանական համագործակցության ընդլայնման հնարավորությունները, ինչպես նաև տարբեր ոլորտներում արձանագրված համագործակցության դրական արդյունքները։
Դեսպան Բալայանը նախագահ դը Ռուվերին ներկայացրել է Հայաստան-Եվրամիություն ռազմավարական օրակարգի գործընկերության ձեռքբերումները՝ ընդգծելով, որ Երևանի և Բրյուսելի հարաբերությունները թևակոխել են որակական և պատմական նոր փուլ, որի տրամաբանական հանգրվանն է այս տարվա մայիսին նախատեսվող ՀՀ-ԵՄ առաջին գագաթնաժողովը։
Հայաստանի խաղաղության օրակակարգի առաջմղման համատեքստում Բալայանը հանգամանալից ներկայացրել է վաշինգտոնյան Խաղաղության գագաթնաժողովի արդյունքները և դրանից հետո տեղի ունեցող զարգացումներն ու տարածաշրջանում կայունության և խաղաղության մթնոլորտի հաստատման նպատակով Հայաստանի հետևողական ջանքերը։
Հայաստանի դեսպանը Բելգիայի խորհրդարանի նախագահի ուշադրությունն է հրավիրել Բաքվում հայ պատանդների ազատման խնդրի վրա՝ շեշտելով, որ հայ պատանդների վերադարձը հավելյալ խթան կհանդիսանա տեղի ունեցող առկա դրական զարգացումներին։
Զրուցակիցները մտքեր են փոխանակել առաջիկա բարձրաստիճան այցելությունների ժամանակցույցի վերաբերյալ։
