Ադրբեջանի արտաքին գործերի նախարար Ջեյհուն Բայրամովն ընդունել է ԱՄՆ Պետդեպարտամենտի Եվրոպայի և Եվրասիայի հարցերով բյուրոյի գլխավոր ներկայացուցիչ Բրենդան Հանրահանին։
Ըստ Ադրբեջանի ԱԳՆ-ի տարածած հաղորդագրության՝ կողմերը քննարկել են ադրբեջանաամերիկյան հարաբերությունները, ռազմավարական գործընկերության խարտիայի պատրաստման համար ռազմավարական աշխատանքային խմբի ստեղծման մասին փոխըմբռնման հուշագրից բխող հարցեր, Ադրբեջանի և Հայաստանի միջև հարաբերությունների կարգավորման գործընթացը, ինչպես նաև փոխադարձ հետաքրքրություն ներկայացնող տարածաշրջանային և միջազգային անվտանգության հարցեր։
Նշվում է նաև, որ կողմերը մտքեր են փոխանակել երկկողմ հարաբերությունների երկարամյա պատմության, ինչպես նաև փոխշահավետ համագործակցության վերաբերյալ, այդ թվում՝ անվտանգության և էներգետիկայի ոլորտներում։
Հատկապես նշվել է այս տարվա օգոստոսին կայացած բարձր մակարդակի այցի և շփումների նշանակությունը երկրների միջև հարաբերությունների զարգացման համար։
«Ընդգծվել է Վաշինգտոնում Ադրբեջանի և Հայաստանի միջև խաղաղության օրակարգի առաջխաղացման վերաբերյալ Ադրբեջանի նախաձեռնությամբ ձեռք բերված պատմական համաձայնությունների նշանակությունը, այդ թվում՝ խաղաղության համաձայնագրի նախաստորագրումը և հակամարտությունից հետո մնացած կառույցների վերացումը»,-ասվում է հայտարարության մեջ։
