Հայաստանի և Ադրբեջանի միջև վերջին զարգացումները, ինչպես նաև հաղորդակցման ուղիների վերաբացման վերաբերյալ սկզբունքային պայմանավորվածությունը նոր էջ են բացել երկխոսության համար, այդ թվում՝ «3+3» ձևաչափով։ Այս մասին իրանական IRNA գործակալությանը տված հարցազրույցում ասել է ՀՀ ԱԳ փոխնախարար Վահան Կոստանյանը։
Նա, մասնավորապես, նշել է. «Վերջին նախարարական հայտարարության համաձայն՝ հաջորդ նիստը պետք է տեղի ունենա Երևանում կամ Բաքվում, մենք նախատեսում ենք երկկողմ խորհրդակցություններ ադրբեջանական կողմի հետ»:
Կոստանյանը հիշեցրել է, որ Հայաստանը մասնակցել է այս ձևաչափին առաջին իսկ նիստից, նախ՝ փոխնախարարների, ապա՝ նախարարների մակարդակով։
«Մենք կարծում ենք, որ այս երկխոսության ձևաչափը կարող է լավ հարթակ լինել տարածաշրջանային նախագծերի, հատկապես՝ փոխկապակցվածության ծրագրերի քննարկման համար»,-ասել է նա:
