«Սիրելի երևանցինե՛ր, մոտավորապես 7.5 մլրդ դրամ Երևանի քաղաքապետարանն այս տարվա ընթացքում սուբսիդավորում է «Երևանի ավտոբուս» ՓԲԸ-ն»,-գործակարգավարական խորհրդակցության ժամանակ հայտարարեց քաղաքապետ Տիգրան Ավինյանը։
Բացատրելով, թե ինչու է այդ թիվը հատուկ բարձրաձայնում՝ Տիգրան Ավինյանն ասաց, թե Երևանի ավագանու նիստերին բազմիցս լսել է, որ ընդդիմադիրներն ասում են, որ կա ստվեր և պետք է աշխատել այն վերացնելու համար։
Նա վստահեցրեց, որ քաղաքապետարանն այդ ուղղությամբ աշխատում է և ՓԲԸ-ի ավելացող հասութները դրա մասին են վկայում։
«Բայց, այնուամենայնիվ, մենք պետք է հասկանանք, որ Երևանում բարեկեցիկ հասարակական տրանսպորտ ապահովելու համար այս ծախսերը գնալով ավելանում են և ամեն նոր գնված շարժակազմի հետ շարունակելու են ավելանալ»,-հայտնեց Ավինյանը և հիշեցնելով, որ ընթացիկ տարում արդեն գնել են 171 նոր ավտոբուս և 15 տրոլեյբուս, հավելեց. «Սիրելի երևանցինե՛ր, մենք խնդրում ենք, որ նվազագույնը նոյեմբերի 1-ից դուք տրանսպորտից օգտվելիս վճարման ընդամենը երկու եղանակ օգտագործեք՝ 100-դրամանոց մետաղադրամով և էլեկտրոնային տոմսերով։ Եթե մենք ուզում ենք, որ Երևանում ունենանք բարեկեցիկ, շարունակական զարգացող հասարակական տրանսպորտ՝ մենք էլ խնդրում ենք ձեզ աջակցել մեզ այդ գործում և օգտվել կա՛մ էլեկտրոնային տոմսային համակարգից, կա՛մ ունենալ 100-դրամանոց մետաղադրամ»
Նա հայտնեց,որ Երևանի քաղաքապետարանը ծախսերի ավելացման այս տեմպերով այդ բեռը չի կարողանա միայնակ իր վրա վերցնել և պահել, այդ պատճառով էլ 2025 թվականին ներդրվող տոմսայաին համակարգը որոշ չափով մեղմելու է այդ բեռը։
