Մարդու իրավունքների պաշտպանի երիտասարդ ներկայացուցիչները` Սամվել Կարապետյանն ու Անգելինա Հարությունյանը, հուլիսի 1-2-ը Բրատիսլավայում մասնակցել են Երեխաների հարցերով օմբուդսմանների եվրոպական ցանցի (ENOC) կողմից կազմակերպված Երիտասարդ Խորհրդատուների եվրոպական ցանցի (ENYA) ֆորումին: Հայտնում են ՄԻՊ գրասենյակից։
Երեխաներին ուղեկցել են ՄԻՊ աշխատակազմի կոնվենցիոն մանդատների ապահովման վարչության պետ Ժաննա Հակոբյանն ու վարչության երեխաների իրավունքների պաշտպանության բաժնի փորձագետ Անահիտ Մանուկյանը:
«Եկեք խոսենք երիտասարդներ, եկեք խոսենք այլընտրանքային խնամք ստացող երեխաների իրավունքների խթանման և պաշտպանության մասին» խորագրով միջոցառման շրջանակներում երեխաները ներկայացրել են իրենց տեսակետները, մասնակցել են ոլորտի կատարելագործմանն ուղղված առաջարկությունների մշակման աշխատանքներին, հանդես են եկել ելույթներով:
ֆորումի մասնակից թիմերի համատեղ մշակած առաջարկությունները կներկայացվեն 2024 թվականի սեպտեմբերին կայանալիք Երեխաների օմբուդսմանների եվրոպական ցանցի (ENOC) համաժողովի շրջանակում։
Պաշտպանը կարևորում է երեխաների ակտիվ մասնակցությունն իրենց իրավունքների պաշտպանության և որոշումների կայացման գործընթացներում` ինչպես ներպետական, այնպես էլ միջազգային հարթակներում:
