Հայաստանում խտրական արդարադատություն է իրականացվում, Սուրբ Աննա եկեղեցու բակում ընթացող հավաքի ժամանակ ասաց փաստաբան Սերգեյ Հարությունյանը։
«Գործ ունենք խտրական արդարադատության հետ․ ո՛չ Աշոտ Սիմոնյանի դեպքով, երբ ոստիկանների կողմից դաժանաբար ծեծի ենթարկվեց ԱԺ պատգամավորը, ո՛չ ԱԳՆ-ի դեպքով, երբ սադրանքների հետևանքով մարդկանց նկատմամբ անհիմն ուժ կիրառելով՝ բերման ենթարկեցին և 29 անձ ձերբակալվեց, ո՛չ հունիսի 12-ի դեպքով, երբ կազմակերպված սադրանքների հետևանքով անհամաչափ ուժ կիրառվեց, մարդիկ բռնության, ծեծի ենթարկվեցին, նաև հատուկ աննախադեպ միջոցներ կիրառվեցին, որոնք ցույցեր ցրելու համար չեն նախատեսված, այլ ահաբեկիչների դեմ պայքարելու, այդ բոլոր գործերով չկա ոչ մի ոստիկան, որին մեղադրանք է առաջադրվել։
Բայց և՛ ԱԳՆ-ի դեպքով ունենք կալանավորված ու ձերբակալված անձինք, և՛ հունիսի 12-ի դեպքով»,- ընդգծեց փաստաբանը։
Նա մանրամասնեց՝ ապօրինություններ թույլ տված ոստիկաններին իշխանության հրահանգով պատասխանատվության չեն ենթարկում առաջին հերթին այն պատճառով, որպեսզի «համակարգը չերերա»՝ ոստիկանների գործընկերները չերկմտեն՝ ապօրինի հրամաններ կատարելիս և վախ չունենան, որ դրա համար կարող են պատժի ենթարկվել։
