Նորակոչիկներին հայոց բանակ են ճանապարհել Շիրակի մարզպետ Մուշեղ Մուրադյանը, մարզպետի աշխատակազմի, ՀՀ ՊՆ Զորակոչային և զորահավաքային համալրման ծառայության Շիրակի մարզի տարածքային ստորաբաժանման ղեկավարի պարտականությունները ժամանակավոր կատարող Իշխան Գրիգորյանը, ծառայության Շիրակի մարզի պատասխանատուները, նորակոչիկների հարազատները։
Շիրակի մարզպետը ծառայության մեկնող տղաներին կոչ է արել չընկրկել խոչընդոտների առջև՝ մաղթելով խաղաղ և անփորձանք ծառայություն․ «Սիրելի նորակոչիկներ, մեզ համար հուզումնալից՝ ձեզ համար վստահ եմ՝ պատիվ է լինել հայ զինվոր, ծառայել Հայաստանի Հանրապետությանն ու զինված ուժերին։
Ցանկանում եմ, որ ծառայությունն անցի առանց փորձությունների, խաղաղ երկնքի տակ և առողջ ու կամքով առավել զորեղացած վերադառնաք ձեր օջախներ։ Սիրելի ծնողներ, ես ձեզ առավել քան հասկանում եմ, ես էլ եմ զինվորի հայր։
Հպարտ եղեք, գիտեմ դժվար է ճանապարհել զավակին, բայց դուք այսօրվանից հատուկ կարգավիճակ ունեք՝ զինվորի ծնող եք և այս բառերը հպարտության զգացում թող առաջացնեն ձեզ մոտ, հայրենիքին պաշտպան եք ճանապարհում, ում պետք է սպասեք մեծ սիրով ու գորովանքով, բոլորիդ բարի երթ, խաղաղ և անվտանգ ծառայություն, իսկ ծնողներին ու հարազատներին՝ համբերություն»։
