Հայաստանում առանձնապես ծանր հանցագործությունները 27 տոկոսով աճել են, այս մասին կառավարության նիստում ասաց վարչապետ Նիկոլ Փաշինյանը։
«Բայց այս աճի մի մասը կապված է այն օրենսդրական փոփոխության հետ, որ հանկարծամահության դեպքով հարուցվում է քրեական գործ, ընդ որում, դա արդարացված է, որովհետև լինում են դեպքեր, որ շատ նման է հանկարծամահության, բայց քրգործի շրջանակներում պարզվում է, որ սպանություն է տեղի ունեցել»,- նշեց Փաշինյանը։
Վարչապետն ասաց, թե հանցավորության դեմ պայքարը լուրջ մարտահրավեր է։
«Պետք է արձանագրենք՝ ինչքան տնտեսությունն աճում է, այդքան մարդկանց հոսքն աճում է, դա մարտահրավեր է։ Մենք շատ զգույշ ենք զբոսաշրջիկների հետ կապված հանցագործությունների վերաբերյալ, որովհետև դա կարող է վատ իմիջ ստեղծել»,- նշեց նա։
