Հանրապետության նախագահ Վահագն Խաչատուրյանը չի կարծում, որ ՀՀ իշխանությունները ձեռքերը լվացել են Արցախի հարցից։
«Չէ, կարծում եմ՝ ընդհակառակը, կա ճշմարտությունն ասելու և ճշմարտությունը լսելու պատրաստակամության խնդիր։ Մենք հասել ենք այն հանգրվանին, որ իրականում պետք է կարողանանք Լեռնային Ղարաբաղում ապրող մեր հայրենակիցների անվտանգության հարցը լուծենք։ Որևէ մեկնաբանություն, որն ուղղված է նրան, որ իշխանությունը մոռացել է, դրանով չի զբաղվում, ընդհանրապես իրականության հետ կապ չունի»,- լրագրողների հետ զրույցում ասաց Խաչատուրյանը։
Նրա խոսքով՝ շատ բարդ բանակցային գործընթաց է, իրավիճակն էլ շատ բարդ է։
«Մեր ձգտումն է հնարավորինս շուտ խաղաղության համաձայնագիրը ստորագրել, որպեսզի անընդհատ հերթական անորոշ իրավիճակում չհայտնվենք այն առումով, որ կարող է սահմանում զորքեր կուտակվեն, կարող է՝ չկուտակվեն, այլ մենք կունենանք վստահելի մի միջավայր, որտեղ վաղվա հետ կապված, նաև սահմանների անձեռնմխելիության և ինքնիշխանության կորստի հետ կապված որևէ խնդիր չունենանք»։
