Ադրբեջանական իշխանությունների աջակցությամբ արշավ է սկսվել ադրբեջանցի այն ընդդիմադիր բլոգերների դեմ, ովքեր դժգոհություն են հայտնել Հայաստանի նկատմամբ Ադրբեջանի ռազմական գործողություններից: Նրանք պիտակավորվել են որպես «դավաճաններ»:
Մասնավորապես, օրեր առաջ «Նոր Ադրբեջան» իշխող կուսակցության երիտասարդական թևը հրապարակել է բլոգերների և քաղաքական գործիչների մասնակցությամբ տեսանյութ, որն ուղեկցվել է «#xainləritanı» հեշթեգով, որը նշանակում է «ճանաչիր դավաճաններին»։
Հոլովակում ներկայացված անձինք նշում էին, որ Ադրբեջանը խախտել է Հայաստանի միջազգայնորեն ճանաչված սահմանները: Նրանք արտահայտում էին իրենց անհամաձայնությունն Ադրբեջանի կողմից Հայաստանի դեմ սանձազերծված ռազմական գործողությունների վերաբերյալ:
«Ադրբեջանական կողմը բացահայտ ընդունում է այլ երկրի տարածք ներխուժելու մտադրությունը», — ասել է Գերմանիայում բնակվող լրագրող, նախկին ադրբեջանցի քաղբանտարկյալ Աֆղան Մուխթարլըն:
«Ադրբեջանը խախտում է Հայաստանի միջազգայնորեն ճանաչված սահմանները և մտնում նոր պատերազմի մեջ»,- ասել էր բլոգեր Թուրալ Սադըգլըն, որը նույնպես բնակվում է Գերմանիայում։
