ՀԱՊԿ քարտուղարությունն ուշադիր հետևում է ղրղզա-տաջիկական սահմանին տիրող իրավիճակին։ Այս մասին հայտարարել է ՀԱՊԿ մամուլի քարտուղար Վլադիմիր Զայնետդինովը:
«ՀԱՊԿ քարտուղարությունը լրջորեն մտահոգված և անհանգստացած է 2022 թվականի սեպտեմբերի 14-16-ը Ղրղզստան-Տաջիկստան սահմանին ծանր զինատեսակների կիրառմամբ ուղեկցվող բախումներով: Մենք մեր անկեղծ ցավակցությունն ենք հայտնում զոհվածների հարազատներին ու մտերիմներին, կիսում ենք նրանց ցավն ու կորուստը»,-ասել է ՀԱՊԿ ներկայացուցիչը։
Կազմակերպությունը ողջունել է նաև հրադադարը և երկու երկրների սահմանային ծառայությունների միջև բանակցությունները։ Զայնետդինովը ուժի կիրառումն անվանել է հակամարտության լուծման անընդունելի մեթոդ։
Տաջիկստանի եւ Ղրղզստանի ռազմական ստորաբաժանումների բախումների ընթացքում զոհվել է 2 տասնյակից ավելի զինվորական, կան հարյուրավոր վիրավորներ:
