Բաքվում Իրանի դեսպան Սեյյեդ Աբբաս Մուսավին թվիթերի շարքում մանրամասն անդրադարձել է երկու հյուսիսային հարեւանների՝ Հայաստանի եւ Ադրբեջանի նկատմամբ Իրանի դիրքորոշմանը, գրում է Mehr-ը։
«Տարածաշրջանային եւ միջազգային հակամարտություններում Իրանի Իսլամական Հանրապետության սկզբունքային դիրքորոշումները միշտ հիմնված են պատվի, իմաստության, նպատակահարմարության, արդարության, արդարադատության եւ միջազգային իրավունքի վրա»,- ասվում է Սեյյեդ Աբբաս Մուսավիի իր առաջին թվիթում: «(Իրանի) իսթեբլիշմենտի իմաստուն իշխանությունները, միանշանակ, լավագույն ժամանակին կայացնում են լավագույն որոշումը եւ միշտ պաշտպանում են իրենց սեփական եւ տարածաշրջանային ազգային շահերն ու անվտանգությունը»:
«Արտաքին եւ պաշտպանական քաղաքականություն վարող որոշումներ կայացնողների, քաղաքական գործիչների եւ պաշտոնյաների վրա ազդեցությունը, եթե այն ունի վերը նշված բաղադրիչները եւ զուրկ է ռացիոնալությունից ու հեռատեսությունից, կասկածելի է, վնասակար եւ ավելի շուտ լրացնում է Իրանի թշնամիների գլուխկոտրուկը եւ ոչնչացնում է կառավարության քաղաքականությունը հարեւանների նկատմամբ»,- հավելել է նա:
«Ինչ վերաբերում է հյուսիսային հարեւաններին, ապա Իրանի դիրքորոշումները հայտնի են արդեն 30 տարի եւ բազմիցս հնչեցրել են հեղափոխության առաջնորդը, նախագահը, ԱԳ նախարարը եւ ԱԳՆ մամուլի քարտուղարը, այն է՝ միջազգային սահմանների անփոփոխությունը եւ հակադրությունն աշխարհաքաղաքական փոփոխություններին»,- հավելել է նա։
Եզրափակելով՝ դիվանագետն ընդգծել է, որ «ցանկացած դիտավորությամբ լրացուցիչ եւ զուգահեռ դիրքորոշում հայտարարելու պահանջը ոչ պրոֆեսիոնալ եւ վնասակար է»։
Ավելի վաղ Իրանի նախագահ Էբրահիմ Ռաիսին հայտարարել էր, որ կովկասյան տարածաշրջանում խաղաղության, կայունության եւ անվտանգության հաստատումը շատ կարեւոր է Իրանի Իսլամական Հանրապետության համար։
«Մենք միշտ ընդգծել ենք տարածքային ամբողջականությունը, ազգային ինքնիշխանությունը հարգելու անհրաժեշտությունը եւ մերժել ենք Հայաստանի եւ Ադրբեջանի միջեւ ճանաչված սահմանների ցանկացած փոփոխություն։ Կողմերը պետք է լուծեն իրենց տարաձայնությունները երկխոսության եւ խաղաղ ճանապարհով՝ միջազգային իրավունքի հիման վրա։ Քանի որ Իրանի Իսլամական Հանրապետությունը պաշտպանում է իր ազգային շահերն ու անվտանգությունը եւ տարածաշրջանը, այն նաեւ հայտարարում է այս երկու հարեւան երկրների միջեւ տարաձայնությունների լուծմանն օգնելու իր պատրաստակամության մասին»,- ասել է նա:
Իսկ մինչ այդ Իրանի նախագահը ՌԴ նախագահ Վլադիմիր Պուտինին ասել էր, որ Հարավային Կովկասի տարածաշրջանի աշխարհաքաղաքականության ցանկացած փոփոխություն ապակայունացնող եւ անընդունելի գործողություն է։
