Գերմանիայի կանցլեր Օլաֆ Շոլցը կոչ է արել Ադրբեջանին և Հայաստանին կարգավորել հակամարտությունը բանակցությունների միջոցով և զերծ մնալ հետագա բախումներից։
Ինչպես գրում է faz.net-ը, կանցլերն այս մասին ասել է Բեռլինում Վրաստանի վարչապետ Իրակլի Ղարիբաշվիլիի հետ համատեղ մամուլի ասուլիսում։
Գերմանիայի դաշնային կառավարությունը նախկինում «խորը մտահոգություն» էր հայտնել հայ-ադրբեջանական սահմանին ռազմական գործողությունների մասին հաղորդագրությունների առնչությամբ։
Հիշեցնենք, որ Ադրբեջանի զինված ուժերը սեպտեմբերի լույս 13-ի գիշերը՝ 00:05-ի սահմաններում, հարձակման են անցել Հայաստանի Հանրապետության պետական սահմանի երկայնքով՝ ռազմական գործողություններ ձեռնարկելով Սյունիքի, Վայոց ձորի և Գեղարքունիքի մարզերի ուղղություններով: ՀՀ պաշտպանության նախարարությունը հայտնել է, որ հրետակոծման են ենթարկվել Սոթքի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը: Հարվածներ են հասցվում նաև քաղաքացիական ենթակառուցվածքներին: Նախնական տվյալներով՝ հայկական կողմն ունի 105 զոհ: ՀՀ ՊՆ մամուլի խոսնակ Արամ Թորոսյանը երեկոյան ճեպազրույցի ընթացքում հայտնել է, որ ժամը 20։00-ից բոլոր ուղղություններով կրակը գրեթե դադարել է, էական միջադեպեր չեն արձանագրվել։