Նրա մեկնաբանությունները հնչել են այն ժամանակ, երբ Դանիան դարձել է ԵՄ առաջին երկիրը, որը վերացրել է COVID-ի հետ կապված բոլոր ներքին սահմանափակումները, չնայած ավելի մեղմ «օմիկրոն» տարբերակի դեպքերի ռեկորդային թվին:
«Մենք անհանգստացած ենք, որ որոշ երկրներում տարածվել է այն կարծիքը, թե պատվաստանյութերի, ինչպես նաեւ «օմիկրոնի» բարձր փոխանցելիության եւ ցածր ծանրության պատճառով փոխանցման կանխարգելումն այլեւս հնարավոր չէ եւ այլեւս անհրաժեշտ չէ»,- ասել է Թեդրոսն՝ ընդգծելով, որ «COVID-19-ի փոխանցման դեպքերի ավելի մեծ թիվը նշանակում է ավելի շատ մահեր»։
ՄԱԿ-ի առողջապահական գործակալության ղեկավարը նշել է, որ 10 շաբաթ առաջ հարավային Աֆրիկայում օմիկրոնի հայտնաբերումից հետո ԱՀԿ-ում գրանցվել է մոտ 90 միլիոն դեպք՝ ավելի շատ, քան ամբողջ 2020 թվականի ընթացքում:
Ու թեեւ հայտնի է, որ COVID-ի նոր տարբերակը ավելի մեղմ է, նա նշել է, որ «մենք այժմ սկսում ենք տեսնել մահացությունների շատ տագնապալի աճ՝ աշխարհի տարածաշրջանների մեծ մասում»: Նրա խոսքով՝ շատ կարեւոր է շարունակել վիրուսի փոխանցումը դադարեցնելու ջանքերը։
«Մենք ոչ մի երկրի կոչ չենք անում վերադառնալ, այսպես կոչված, մեկուսացման»,- ասել է Գեբրեեսուսը՝ հավելելով, որ, այնուամենայնիվ, «մենք կոչ ենք անում երկրներին պաշտպանել իրենց ժողովրդին՝ օգտագործելով բոլոր գործիքները, այլ ոչ թե միայն պատվաստանյութերը»:
ԱՀԿ-ի ղեկավարն ընդգծել է առաջացող տարբերակներին, ներառյալ «օմիկրոնի» BA.2 ենթատեսակին հետեւելու անհրաժեշտությունը: «Այս վիրուսը կշարունակի զարգանալ, ուստի մենք կոչ ենք անում երկրներին շարունակել թեստավորումները, հսկողությունը եւ հաջորդականությունը»,- ասել է նա:
COVID-19-ի հարցով ԱՀԿ-ի տեխնիկական ղեկավար Մարիա Վան Կերխովեի խոսքով՝ շատ երկրներ դեռեւս չեն հասել «օմիկրոնի» իրենց գագաթնակետին, եւ դրա տարածումը զսպելու միջոցները պետք է աստիճանաբար մեղմացվեն:
ԱՀԿ-ի արտակարգ իրավիճակների հարցերով ղեկավար Մայք Ռայանը կոչ է արել երկրներին համավարակից դուրս գալու իրենց սեփական ուղին գծել, այլ ոչ թե կուրորեն հետեւել մյուսներին: «Եթե դուք արագ եք բացում դռները, ավելի լավ է դրանք բավականին արագ փակելու հնարավորություն ունենալ»,- ասել է նա: