Կառավարությունում լրագրողների հետ զրույցի ժամանակ ՀՀ արդարադատության նախարար Կարեն Անդրեասյանը չպատասխանեց հարցին, թե ինչու Նիկոլ Փաշինյանն իր ամանորյա ուղերձում անդրադարձ չկատարեց Բաքվում պահվող հայ ռազմագերիներին:

«Ճիշտ կլինի հարցը վարչապետի աշխատակազմին ուղղել: Սա նույնիսկ քաղաքական թիմի պատասխանատուի հարց չէ: Ելույթն իր մեջ ուներ բազմաթիվ կարևոր ուղերձներ, և ես կարծում եմ, որ պետք է կենտրոնանալ այն բոլոր կարևոր մաղթանքներին ու սպասումներին, որ վարչապետն առաջացրեց»,-ասաց նախարարը:

Դիտարկմանը՝ քանի որ ելույթում գերիների մասին խոսք չկար, նրանց վրա պետք չէ՞ կենտրոնանալ, Կարեն Անդրեասյանն ասաց, որ այդ հարցը շատ կարևոր է, և նրանք բոլորն այդ ուղղությամբ աշխատում են:

«Սա այն ցավոտ խնդիրներից է, որի մասին ոչ մի րոպե մեր ոչ մի գործադիր անդամ չի մոռանում»,-նշեց Կարեն Անդրեասյանը:

Հարցին, թե ինչու Բաքվից վերադարձած 10 գերիներից 5-ին ձերբակալեցին, իսկ մյուս 5-ին՝ ոչ, նախարարը նշեց, որ կոնկրետ քրեական գործեր են և դրանցով իրավապահ մարմիններն են իրավասու:

«Եթե ես նույնիսկ գնահատական տամ, կստացվի, որ միջամտում եմ քննչական կոմիտեի կամ դատախազության աշխատանքներին, ինչը քրեորեն պատժելի արարք է: Այսինքն ինձանից ակնկալում եք, որ ձեր հարցին պատասխանելով խախտեմ օրենքը»,-ասաց նախարարը: