Իսրայելի պաշտպանության նախարար Բենի Գանցի տանն աշխատող հավաքարարը ձերբակալվել է Իրանի օգտին լրտեսելու կասկածանքով: Ինչպես գրում է timesofisrael.com-ը, այս մասին հայտնել է հրեական պետության ընդհանուր անվտանգության ծառայությունը: Տղամարդը՝ Օմրի Գորենը, ձերբակալվել է Իրանի հետ կապակցված հաքերային խմբի հետ կապվելուց անմիջապես հետո՝ մինչ նա կարող էր որևէ վնաս հասցնել երկրին: Արդյունքում Իսրայելի Կենտրոնական շրջանի դատախազը Գորենի դեմ մեղադրանք է ներկայացրել լրտեսության համար, որը նախատեսում է 10-15 տարվա ազատազրկում։ Աղբյուրը մանրամասնում է, որ Գորենն այս ամսվա սկզբին կապ է հաստատել «Իրանի հետ փոխկապակցված անձի հետ և առաջարկել օգնել նրան տարբեր հարցերում՝ հաշվի առնելով նրա մուտքը նախարարի տուն»: Մեղադրական եզրակացության մեջ  այդ անձը նշված է որպես Իրանի հետ կապված Black Shadow հաքերային խմբի ներկայացուցիչ, որն անցյալ ամիս խոշոր կիբերհարձակում է իրականացրել իսրայելական քաղաքացիական կայքերի վրա: Ինչ վերաբերում է դրդապատճառներին, ապա նշվում է, որ Գորենը գործել է ֆինանսական նկատառումներից ելնելով՝ իբր ասելով խմբին, որ «նախարարի տնից տեղեկություն կփոխանցի գումարի դիմաց»։ Կազմակերպության ներկայացուցչի հետ կապ հաստատելուց հետո Գորենը քննարկել է Գանցի տնային համակարգչի վրա վնասակար ծրագրերի տեղադրման հնարավորությունը, որը Իրանին կապակցված անձանց օպերատիվ հասանելիություն կտար նախարարի սարքին: «Իր կարողությունն ու անկեղծությունն ապացուցելու համար Օմրին լուսանկարել է մի շարք առարկաներ նախարարի տան տարբեր հատվածներում, որոնք ուղարկել է Իրանի հետ կապված անձին, այդ թվում՝ նախարարի համակարգչի նկարները», - ասվում է պաշտոնական հաղորդագրությունում: Նա լուսանկարել է Գանցի գրասեղանը, համակարգիչը, հեռախոսը և պլանշետը, փակ պահարանը և մանրացնող սարքը, ինչպես նաև նախարարի գույքահարկի տեղական վճարումների պատճենը։ Ծառայության տվյալներով՝ իր արագ ձերբակալման պատճառով Գորենը չի կարողացել իրականացնել իր պլանները, որոնք կվնասեին ազգային անվտանգությանը։