Իշխանություններն ընտրություններից հետո շարունակում են համատարած բռնաճնշումները բոլոր այն անձանց նկատմամբ, ովքեր չեն քվեարկել իրենց օգտին։ Այս մասին այսօր հրավիրած ասուլիսում ասաց ՀՅԴ գերագույն մարմնի անդամ Իշխան Սաղաթելյանը։ «Մասնավորապես, մեծ ծավալով շարունակվում են ապօրինի ճնշումները ընտրված համայնքների ղեկավարների նկատմամբ։ Դրանով փորձ է արվում քանդել նաև տեղական ինքնակառավարման ինստիտուտը, դա դարձնել ըստ էության նշանակովի։ Արդեն կան բազմաթիվ ակնհայտ ճնշումներ բոլոր այն համայնքների ղեկավարների նկատմամբ, ովքեր մաս են կազմել «Հայաստան» դաշինքին կամ ունեցել են այլ դիրքորոշում, որը տարբերվել է գործող իշխանության դիրքորոշումից։ Ակնհայտ ճնշումներ են շարունակվում նաև հանրային ծառայողների նկատմամբ։ Մենք այս բոլորը հավաքագրում ու արձանագրում ենք, այս ամենը ներկայացնելու ենք նաև միջազգային կազմակերպություններին և ձեռնարկելու ենք բոլոր անհրաժեշտ քայլերը՝ մեր համակիրների, աջակիցների իրավունքների պաշտպանությունը կազմակերպելու ուղղությամբ»,- ասաց Սաղաթելյանը։ Նա նաև հայտարարեց, որ ՀՅԴ-ն շարունակելու է համագործակցությունը «Հայաստան» դաշինքի շրջանակներում։ Իշխան Սաղաթելյանը նաև նշեց, որ ՀՅԴ գերագույն ժողովը հայտարարություն է ընդունել: Դրանում, մասնավորապես, արձանագրվել է, որ խորհրդարանական ընտրությունները չեն հանգուցալուծել երկրի քաղաքական և ներհասարակական ճգնաժամը: Զանվածաբար գործի դնելով վարչական, ֆինանասական լծակները, կեղծիքները՝ իշխանությունը վերարտադրվել է, ինչը, ըստ դաշնակցականների, լրջագույն մատահրավեր է ազգային անվտանգության և պետականության համար: «ՀՅԴ գերագույն ժողովը, ելենելով ստեղծված իրավիճակից, հայտարարում է, որ հետամուտ է լինելու հայրենադավ իշխանության հեռացման պայքարին, հանդես է գալու իբրև արմատական ընդդիմություն, գործադրելու է քաղաքական պայքարի հնարվոր բոլոր միջոցները», - նշված է հայտարարության մեջ: Նշվում է նաև, որ «Հայաստան» դաշինքը դարձել է իշխանության իրական ու գլխավոր այլընտրանքը: Դաշինքի շրջանակում գործըներությունը շարունակվելու է: ՀՅԴ-ն իր կուսակցական շարքերին, երկրի ապագայով մտահոգ անձանց կոչ է անում շարունակել վճռական պայքարը՝ օր առաջ իշխանություններին հեռացնելու և ուժեղ Հայաստան կառուցելու համար: