Այս պահին ունենք կորոնավիրուսով վարակվելու մինչև 300 կրկնակի դրական թեստի արդյունք, կառավարության նիստից հետո լրագրողների հետ զրույցում ասաց ՀՀ առողջապահության նախարար Անահիտ Ավանեսյանը։ «Բայց գնահատական տալ՝ արդյոք դա կրկնավարակ է, թե դեռ վարակը մարդու օրգանիզմից դուրս չի եկել, ուսումնասիրություն ենք իրականացնում, երբ լինեն արդյունքները, անպայման կհրապարակենք», - ասաց նախարարը։ Նա նշեց, թե միջինը 90 օր պետք է անցած լինի առաջին թեստից, որպեսզի խոսք գնա կրկնավարակի մասին։ Հայաստանում մարտի 18-ի դրությամբ հաստատվել է կորոնավիրուսի ընդհանուր 181 165 դեպք: Մեկ օրում դեպքերի թիվն ավելացել է 1024-ով: