Համաժողովրդական շարժմանը միացել են կուսակցություններ, որոնք ընդամենը օրեր առաջ վստահեցնում էին, որ որեւէ փոփոխություն տեղի չի ունենալու եւ որ հնարավոր չէ երկրում իշխանափոխություն անել: Հիմա սակայն իրար հերթ չտալով   Սերժ Սարգսյանի հրաժարականից հետո վազում են հրապարակ, հայտարարելով, թե միանում են ժողովրդին եւ համաժողովրդական շարժմանը: Համաժողովրդական շարժմանն են միացել նաեւ պատգամավորներ, ովքեր նույնիսկ կողմ էին քվեարկել Սերժ Սարգսյանի թեկնածությանը: Irakanum.am-ը ներկայացնում է  համաժողովրդական շարժմանը նախ չմիանալու, հետո արդեն միանալու որոշ  կուսակցությունների ներկայացուցիչների նախկինում եւ այսօր արդեն արված  հայտարարություններից հատվածներ: «Լուսավոր Հայաստան» կուսակցության նախագահ Էդմոն Մարուքյան 19.03.2018 թվական «Մենք գտնում ենք, որ եթե ժամանակին ասել ենք, որ մարդկանց չի կարելի տանել հերթական պարտության, չի կարելի կրկնել 20-25 տարվա ընդդիմության կողմից թույլ տրված սխալները, որի մասին բոլորս ենք խոսել, եւ՛ բոլորս փորձել ենք, եւ՛ ուրիշների սխալների վրա սովորել, եւ՛ մեր սխալների վրա սովորել: Մենք այդ համոզմանն ենք, որ չի կարելի, բայց եթե ուժերից մեկն ունի մի ծրագիր, որը չի տանում հիասթափության, ես չեմ ուզում, որ դրա հնարավորությունը սահմանափակվի: Մարդիկ կան հավատում են ինչ-որ բաների, որոնց մյուսները չեն հավատում: Հետեւաբար՝ մյուսները, ովքեր չեն հավատում, պետք է հարգեն նրանց, ովքեր հավատում են: Եվ նրանք, ովքեր հավատում են, պետք է հարգեն նրանց, ովքեր չեն հավատում»: «Լուսավոր Հայաստան» կուսակցության նախագահ Էդմոն Մարուքյան 25.04.2018 թվական Կուսակցության ղեկավար Էդմոն Մարուքյանը ֆեյսբուքյան իր էջով տեղեկացնում է, որ այսօր իրենք եւս միանում են համաժողովրդական շարժմանը: «Այսօր՝ ժամը 11:00-ին, Լուսավոր Հայաստան կուսակցությունը կլինի հանրապետության հրապարակում եւ կմասնակցի համաժողովրդական շարժման գործընթացին: Հայաստանի հանրապետական կուսակցությունը կորցրել է ժողովրդի վստահությունը եւ վերջինիս կողմից որեւէ անձի առաջադրումը վարչապետի պաշտոնում անընդունելի է եւ պետք է կանխվի»,- գրել է նա: «Հանրապետություն» կուսակցությունը եւս չմիացավ շարժմանը: Կուսակցության ղեկավար Արամ Սարգսյանը միայն ապրիլի 16-ին եկավ Բաղրամյան պողոտա, սակայն հայտարարեց, որ չի միացել շարժմանը: «Այստեղ ենք գտնվում, որովհետեւ քաղաքացիների նկատմամբ բռնություն է կիրառվել»: Արամ Սարգսյան 16.04.2018 թվական: «Պայքարի այս փուլում, երբ դրված է Հայաստանի ինքնիշխանության և անկախության հարցը, «Հանրապետություն» կուսակցությունն իր բոլոր ուժերով և հնարավորություններով մասնակցելու է բողոքի ակտիվ գործողություններին»,- ասված է կուսակցության տարածած հայտարարությունում։  «Հանրապետություն»  կուսակցություն 25.04.2018 թվական:  ՀՅԴ խմբակցության ղեկավար Արմեն Ռուստամյան 16.04.2018 թվական Երեք հոգի հավաքվում են, ասում են՝ ժողովուրդը, քանի՞ մարդը պետք է համարենք ժողովուրդ: Հերիք ա էդ բառն էդպես հանգիստ օգտագործենք: Ժողովու՜րդ... Ապտակին ապտակ, բռունցքին՝ բռունցք: Սովորեք ինքնապաշտպանվել: 25.04.2018 թվական ՀՅԴ-ն դադարեցնում է ՀՀԿ-ի հետ կոալիցիան: Նույն օրը ՀՅԴ ԳՄ անդամ Արսեն Համբարձումյանը հայտարարում է, որ նախատեսում են հանդիպում ունենալ Նիկոլ Փաշինյանի հետ: Լինելու է արժանապատիվ քվեարկություն. Նաիրա Զոհրաբյանը՝ «Ծառուկյան» դաշինքի՝  վարչապետի թեկնածու Սերժ Սարգսյանի  քվեարկության մասին:  13.04.2018 Ժողովուրդ, բոլորս դեպի հրապարակ: Ռեժիմի դիմադրությունը կոտրելուն մնացել է մեկ քայլ: «Ծառուկյան» խմբակցության պատգամավոր Նաիրա Զոհրաբյան 25.04.2018 թվական Շարունակելի...