Ուժային կառույցների ղեկավարների փոփոխությունները կատարվում են քաղաքական ուժերի միավորման հայտարարությունների ֆոնին, և այս նշանակումներով վարչապետը նպատակ ունի պաշտպանել իր իշխանությունը: Այս մասին այսօր Irakanum.am-ի հետ զրույցում ասաց քաղտեխնոլոգ Արմեն Բադալյանը: Նա պատահական չհամարեց, որ երբ «Բարգավաճ Հայաստան» խմբակցության առաջնորդը խոսեց կառավարությանն անվստահություն հայտնելու մասին, վարչապետն անմիջապես փոխեց ուժային կառույցների ղեկավարներին ու նշանակեց այնպիսի մարդկանց, ովքեր անձնապես նվիրված են իրեն: Հիշեցնենք, որ «Բարգավաճ Հայաստան» կուսակցության նախագահ Գագիկ Ծառուկյանը ԲՀԿ խորհրդի նիստի ժամանակ ասել է, թե իշխանության անդամների 100 տոկոսը պետք է փոխվի, քանի որ բոլոր ոլորտները ձախողված են։ «Վարչապետը նշում է, թե հիվանդացել է կորոնվիրուսով, բայց ԲՀԿ առաջնորդի հայտարարությունից հետո նրա մոտ հրաշք տեղի ունեցավ և նա առողջացավ: Սա իհարկե, մարդկության պատմության մեջ միակ դեպքն է, քանի որ մշտապես մեկուսացումը գոնե 14 օր պահպանվում է, սակայն վարչապետի մոտ 6-7 օր պահպանվեց: Սա իրոք հրաշք էր»,-ասաց քաղտեխնոլոգը: Հարցին, այսինքն Գագիկ Ծառուկյանի հայտարարությունից հետո վարչապետի մոտ մտավախություննե՞ր են առաջացել, Բադալյանը պատասխանեց. «Չեմ կարող ասել մտավախություններ կան, թե ոչ, սակայն այս գործընթացներն անմիջապես հետևեցին ԲՀԿ առաջնորդի հայտարարությանը, որովհետև ԲՀԿ առաջնորդն իր հեղինակությունը պահպանել է: Դա ցույց տվեցին նաև անցյալ տարի Աբովյանում տեղի ունեցած քաղաքապետի ընտրությունները, երբ վարչապետի կողմից աջակցվող թեկնածուն պարտվեց»: Դիտարկմանը, թե առողջապահական ոլորտում ստեղծված իրավիճակի պատճառով ինչու՞ այս համակարգում փոփոխություններ չեն լինում, նա պատասխանեց. «Առողջապահական համակարգը չի պաշտպանում վարչապետի իշխանությունը, իսկ ուժային կառույցները անհրաժեշտության դեպքում կարող են պաշտպանել նրան»: Բադալյանի խոսքով՝ այն երկրներում, որտեղ կառավարման համակարգը սուպերվարչապետական կամ սուպերնախագահական է, անձնիշխանություն է, ուժային կառույցների ղեկավարները նշանակվում են այն մարդիկ են, որոնք անձնապես նվիրված են թիվ մեկ իշխանավորին: Քաղաքագետ Հրանտ Մելիք-Շահնազարյանի կանխատեսմամբ էլ կադրային փոփոխությունների արդյունքում նոր բերման ենթարկումներ ու քաղաքական պրոցեսներ կլինեն: Նա Irakanum.am-ի հետ զրույցում վստահություն հայտեց, թե ուժային կառույցների փոփոխման նպատակը քաղաքական ընդդիմության նկատմամբ հետապնդումների իրականացումն է: «Վերջին մի քանի ամսիների ընթացքում Փաշինյանը բացի քաղաքական ընդդիմախոսների վրա նոր գործեր «կարելուց», քաղաքական հետապնդում իրականացնելուց ուրիշ ոչնչով չի զբաղվում: Այն պահից սկսած, երբ նա հասկացել է, որ Ազգային անվտանգության ծառայության և ոստիկանության ղեկավարները պատրաստ չեն կատարել իր ապօրինի ցանկությունները, անցել է կադրային փոփոխությունների»,-ասաց Մելիք-Շահնազարյանը: Քաղաքագետն ընդգծեց՝ Փաշինյանը նշանակում է մարդկանց, ովքեր լոյալ են իրեն, հեռու են անվտանգային կառույցների իրավական արժեքները ժառանգելուց ու պարզապես վարչապետի գործիքներն են լինելու: «Նիկոլ Փաշինյանի իշխանության հենքը եղել է ժողովրդական լայն զանգվածների վստահությունը, նա այսօր կորցրել է այդ վստահությունը և փոխարենը որոշել է ստեղծել իրավական բռնապետություն, որտեղ իրավական համակարգը պետք է ծառայի քաղաքական խնդիրներ լուծելու համար: Այսօր ԱԱԾ նոր տնօրենրն ներկայացնելիս նա ինքն էլ ասել է, որ երկու տարի ժամանակ է եղել և ԱԱԾ յուրաքանչյուր աշխատակից պետք է դիրքավորվեր ժողովրդի իշխանության ու դրա արժեքների նկատմամբ: Այսինքն, դիրքավորում է պահանջում ոչ թե պետական շահի, օրենքի նկատմամբ, այլ ի շահ իշխանության»,-ամփոփելով խոսքն ասաց քաղաքագետ Հրանք Մելիք-Շահնազարյանը: Սոնա Գևորգյան