Համահայկական բնապահպանական ճակատի անդամ Լեւոն Գալստյանը ֆեյսբուքյան իր էջում գրել է․  ՀԱՐՑ․ Ինչո՞ւ ՀՀ կառավարությունը միակողմանի չի դադարեցրել Լիդիան Արմենիա ընկերության ընդերքօգտագործման իրավունքը դեռ 2018թ-ի օգոստոս ամսին, երբ ՀՀ ընդերքի մասին օրենսգրքի հոդված 30-ի 5-րդ մասի 4-րդ կետը հստակ թույլ է տվել դա անել՝ ⚠️ 5․ Ընդերքօգտագործման իրավունքը դադարում է, եթե` 4) ընդերքն օգտագործվել է ոչ այն նպատակով, որի համար տրամադրվել է։ Իսկ 6-րդ մասում էլ գրված է՝ 6. Սույն հոդվածի 5-րդ մասով նախատեսված դեպքերում լիազոր մարմինն իրավունք ունի միակողմանի լուծելու ընդերքօգտագործման պայմանագիրը: ‼️ Այս բոլոր հիմքերն եղել են անցած տարի, հիմա էլ կան, բայց չգիտես ինչու չեն արվել համապատասխան քայլերը։ Ներկայացնեմ ինչ է բացահայտվել անցած տարի․ Դեռ 2018թ-ի օգոստոսին ՀՀ դատախազությունը հաղորդագրություն էր տարածել, որտեղ մասնավորապես գրված է հետևյալը․ «ՀՀ բնապահպանության և ընդերքի տեսչական մարմնի ղեկավարի կողմից ՀՀ գլխավոր դատախազություն է ներկայացվել տեսչական մարմնի ղեկավարի 04.07.2018թ. և 17.07.2018թ. հանձնարարագրերի հիման վրա «Լիդիան Արմենիա» ՓԲ ընկերությունում իրականացված ստուգման արդյունքներով կազմված փաստաթղթերը՝ ընկերության կողմից ապօրինի, առանց ընդերքօգտագործման իրավունքի լեռնային զանգվածի տեղահանման փաստերի վերաբերյալ: Դրա հիման վրա ՀՀ գլխավոր դատախազության պետական շահերի պաշտպանության վարչության կողմից կատարվել է ուսումնասիրություն, ինչի նպատակով տեսչական մարմնից պահանջվել և ստացվել են անհրաժեշտ լրացուցիչ փաստաթղթեր և տեղեկատվություն: Ուսումնասիրության արդյունքում պարզվել են Վայոց Ձորի մարզի Ջերմուկ համայնքի Ամուլսարի ոսկեբեր երկրորդային քվարցիտների հանքավայրի լեռնահատկացման ԼՎ-245 ակտի սահմաններում ընկերության կողմից ընդերքի ապօրինի օգտագործման փաստեր: Մասնավորապես, «Լիդիան Արմենիա» ՓԲ ընկերության կողմից օգտակար հանածոյի արդյունահանման պայմանագրի և նախագծի պայմանների շեղումներով, ապօրինի, առանց ըդերքօգտագործման իրավունքի շուրջ 3 հեկտար մակերեսով տարածքից՝ 0,5-10 մետր խորությամբ տարհանվել է բազալտանման լեռնային զանգված և 2 հեկտար մակերեսով տարածքից՝ 0,5-8 մետր խորությամբ՝ կավանման լեռնային զանգված: Դրա հետևանքով, շրջակա միջավայրին, ընդերքին, դրանում պարփակված օգտակար հանածոներին պատճառվել է էական՝ ընդհանուր առմամբ շուրջ 18 միլիոն դրամի վնաս: Նկատի ունենալով, որ արձանագրված խախտումներն առերևույթ պարունակում են հանցագործության հատկանիշներ՝ ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ ՀՀ քրեական օրենսգրքի 291-րդ հոդվածի 2-րդ մասով նախատեսված՝ ընդերքի օգտագործման և պահպանության կանոնների խախտմամբ կամ համապատասխան նախագծերի շեղումներով կամ առանց պայմանագրի ընդերքի օգտագործման և դրա հետևանքով շրջակա միջավայրին, ընդերքին, դրանում պարփակված օգտակար հանածոներին էական վնաս պատճառելու հանցագործության հատկանիշներով: Նախաքննության կատարումը հանձնարարվել է ՀՀ քննչական կոմիտեին»: ‼️ ՀՀ Քննչական Կոմիտեն այս քրեական գործը մեկ տարուց ավել քնացրել է հերիք չէ՝ մյուս լիազոր մարմիններն էլ իրենց հերթին ոչ մի քայլ չեն արել ՀՀ ընդերքի մասին օրենսգրքի վերոնշյալ դրույթները կիրառելու ուղղությամբ։ Այն դեպքում, երբ հստակ նշված է ապօրինի ընդերքօգտագործման փաստերի մասին՝ այսինքն հանքահեններն ընդերքն օգտագործվել է ոչ այն նպատակով, որի համար տրամադրվել է՝ այնտեղից հանելով այլ հանածոներ, որի իրավունքն իրենք չունեին։ Երբ պետությունը չի կիրառում օրենքներն ու աչք է փակում խախտումների վրա՝ հանքահեններն իրենց զգում են ամենակարող և աջ ու ձախ հոխորտում են բոլորի վրա և դիմում դատարաններ։ Մի գուցե պետք է վերջապես մենք էլ ցույց տանք, որ մենք ենք այս երկրի տերն իսկապես, այլ ոչ թե համաշխարհային տարբեր կենտրոնների հանքահենական մաֆիաներն ու ֆինանսական կառույցները։