Օգոստոսի 16-ի առավոտյան շտապօգնության ենթակայանից ոստիկանության Տարոնի բաժնում հաղորդում էր ստացվել, որ Վանաձորի Մոսկովյան փողոցի շենքերից մեկում մարդ է մահացել: Դեպքի վայր մեկնած օպերատիվ խումբը դիակի զննությամբ գլխի շրջանում չսպիացած վերք հայտնաբերեց: Մահացած 48-ամյա տղամարդը Վանաձորի Խորենացու փողոցի բնակիչ էր: Ոստիկանության Տարոնի բաժնի քրեական հետախույզները, համագործակցելով Լոռու մարզային վարչության դատաբժշկական բաժնի հետ, լայնածավալ օպերատիվ-հետախուզական միջոցառումներ ձեռնարկեցին, որոնց արդյունքում դեպքից օրեր անց տեղեկություններ ստացվեցին, որ օգոստոսի 14-ին, ժամը 17-ի սահմաններում, Փամբակ գյուղի 40-ամյա մի բնակիչ նշված հասցեում վիճաբանելով վանաձորցի 48-ամյա տղամարդու հետ` մետաղյա դետալով հարվածել է գլխին, ինչի հետևանքով էլ ավելի ուշ նա մահացել է: Օգոստոսի 22-ին Տարոն-2 թաղամասից կասկածյալը բերման է ենթարկվել և տվել խոստովանական բացատրություն: Փաստի առթիվ հարուցվել է քրեական գործ: Հանգամանքները պարզվում են: Նախաքննությունը շարունակվում է:   https://www.youtube.com/watch?v=r2rhkZPUbEM