Ստեփանակերտում իր ելույթում Նիկոլ Փաշինյանը նշեց, որ համոզված է, որ հավաքից հետո մարդիկ բազմապատկելու և բաժանելու են, թե որքանով է իրատեսական իր կողմից թվարկված մինչև 2050-ի առաջադրված խնդիրների լուծումը. Հայաստանի բնակչությունը հասցնել առնվազն 5 միլիոն մարդու: Ստեղծել 1 միլիոն 500 հազար աշխատատեղ, լուծել 2.5 միլիոն մարդու զբաղվածության հարց և վերացնել աղքատությունը: Հայաստանը դարձնել արդյունաբերական երկիր և 15-ապատկել Հայաստանի ՀՆԱ-ն: Ունենալ 10 միլիարդ դոլար արժեք գերազանցող առնվազն 5 հայկական ընկերություն և 10 հազար աշխատող ստարտափ։ Պետք է յոթնապատկել միջին աշխատավարձը, բանակի մարտունակության ցուցանիշով տեղ զբաղեցնել աշխարհի առաջատար երկրների առնվազն առաջին քսանյակում։ Ունենալ աշխարհի 10 ամենաարդյունավետ հետախուզական ծառայություններից մեկը։ Ապահովել առողջապահական ծառայությունների 100 տոկոսանոց հասանելիություն և առողջապահության ֆինանսավորումը քսանապատկել։ Կրթությունը դարձնել ազգային ապրելակերպ, կրթության և գիտության ֆինանսավորումը քսանապատկել։ Հայաստան այցելող զբոսաշրջիկների թիվը հասցնել 15 միլիոնի։ ՀՀ ֆուտբոլի հավաքականը դարձնել Եվրոպայի կամ  Աշխարհի առաջնության մեդալակիր, նվաճել 25 օլիմպիական ոսկե մեդալ և շախմատի աշխարհի անհատական չեմպիոնի կոչումը։