Սպիտակի 19-ամյա բնակիչ, ժամկետային զինծառայող Արմեն Պարավյանը «Ես եմ» ծրագրով շուրջ մեկ տարի ծառայում է Ասկերանի զորամասերից մեկում: Երրորդ ամիսն է, զորամասի հրամանատարությունը ապօրինաբար զրկում է երիտասարդին տուն մեկնելու իրավունքից: Պատճառը հայտնի չէ: Այս մասին Forrights.am-ին հայտնեց զինծառայողի մայրը՝ Գայանե Պարավյանը: «Ես եմ» ծրագրով 5-ամսյա զինպատրաստություն անցնելուց հետո զինծառայողին ամեն ամիս տրվում է 7-օրյա արձակուրդ, որը ներառում է նաև արձակուրդի վայր մեկնելու և վերադառնալու ժամանակահատվածը: Զինծառայողները ամեն ամիս դրամական ապահովություն են ստանում ՀՀ կառավարության 2014 թվականի հոկտեմբերի 2-ի N 1085-Ն որոշմամբ սահմանված չափով՝ մոտ 35 հազար դրամ, որը ներառում է նրա սնունդի և տուն գնալ-գալու ծախսը: «Այդ գումարը ինձ պետք չի, ինձ պետք է, որ որդիս տուն գա, տեսնեմ նրա վիճակը», — ասում է Գայանեն: Նա անհանգստանալու լուրջ պատճառ ունի: Արմեն Պարավյանը արդեն մեկ տարի է, առողջական խնդիրներ ունի: Զորամաս մեկնելուց հետո մոտ մեկ ամիս անց բժիշկները նրա մոտ որովայնի ճողվածք են հայտնաբերել: «Տղաս գրիժայի վիրահատություն է տարել ուչեբկայի ժամանակ, դրանից հետո նորմալ էր ամեն ինչ: Պրիսյագին գնացինք, նորմալ էր երեխես, վեցերորդ ամսում եկավ տուն», — հիշում է Գայանե Դալլաքյանը: Մայիսի 12-ին մայրը տեղեկանում է, որ որդին նորից վատ վիճակում է: Նրան տարել են զորամասի բուժկետ ու վիրահատության հատվածում հեղուկով լսված պարկ են հայտնաբերել՝ կիստա, ինչպես նաև նոր ճողվածք: Զորամասի հրամանատարությունը խոստացել է, որ նոր վիրահատության կտանեն Արմեն Պարավյանին, սակայն ինչ որ պահից իրադարձությունները անհասկանալի, չարաբաստիկ ընթացք ստացան: Վիրահատությունը ձգձգվում է: Զորամասի հրամանատարությունը հիվանդ, որովայնի շրջանում սուր ցավեր ունեցող զինծառայողին պատշաճ բուժոգնությարձակուրդը, ինչի իրավունքը չունեն: «Զանգեցի ՊՆ, մի մարդ վերցրեց, անունը Դավիթ էր, ասեց՝ մենք զանգել ենք, կտանեն, կբուժեն, բայց խոստումը չի կատարվում: Երեխես վատ ա, նրան չեն բուժում, էսօր-էգուց են անում», — գանգատվում է Գայանեն: Նա որդու հետ հեռախոսով է խոսում, բայց Արմենն իր վիճակի մասին մորը էլ չի պատմում: Ոնց ես՝ հարցին, պատասխանում է՝ լավ եմ, էլի, բայց մայրը զգում է, որ տղան վատ վիճակում է: Մոր սիրտը վատ բան է կանխատեսում: «Ես իր հետ խոսում եմ, ոնց որ ընկճված լինի, անընդհատ ասում ա՝ մամ, զանգեցի՞ր նախարարություն, ի՞նչ եղավ, մամ, վիճակ չկա էլ»: