ՀՀ երրորդ նախագահ Սերժ Սարգսյանի եղբայրը՝ Լյովա Սարգսյանը, հայց է ներկայացրել ընդդեմ Բարձրաստիճան պաշտոնատար անձանց էթիկայի հանձնաժողովի, ինչը դատարանը վարույթ է ընդունել մայիսի 14-ին։ Նշենք, որ Լյովա Սարգսյանը վիճարկում է Էթիկայի հանձնաժողովի կողմից իրեն վարչական պատասխանատվության ենթարկելու մասին որոշումը, որը կայացվել է 09.04.2019 թ.-ին։ Էթիկայի հանձնաժողովի անդամ Էդգար Շաթիրյանից «Փաստինֆո»-ին տեղեկացավ, որ հիշյալ որոշման հիմքում որպես դեսպան լիազորությունները դադարեցնելուց հետո հայտարարագիրը «Հանրային ծառայության մասին» օրենքով սահմանված ժամկետով չներկայացնելն է։ Նշենք, որ Լյովա Սարգսյանը, ով  ՀՀ Նախագահի 2010թ. հրամանագրով նշանակվել էր հատուկ հանձնարարություններով դեսպան, նշված պաշտոնից ազատվել է 2018 թ․ հոկտեմբերի 2-ին։ Հանձնաժողովը հարուցել էր վարույթ, եւ նիստ նշանակել ապրիլի 9-ին, սակայն Լյովա Սարգսյանը չէր ներկայացել, թեեւ, ըստ հանձնաժողովի, վերջինս եղել էր պատշաճ ծանուցված: Նույն օրն էլ նրա նկատմամբ վարչական տույժ էր նշանակվել։ Նշենք, որ գործը մակագրվել է դատավոր Անի Հարությունյանին, եւ առաջին նիստը նշանակվել է հուլիսի 3-ին։ Հիշեցնենք, որ Լյովա Սարգսյանը մեղադրվում է ապօրինի հարստացման մեջ։ Նրա նկատմամբ որպես խափանման միջոց է ընտրվել կալանավորումը, եւ հայտարարվել է հետախուզում։ Փաստինֆո