Վերաքննիչ քրեական դատարանը բեկանել է «Պարտեզ» ռեստորանային համալիրի մոտ տեղի ունեցած զինված միջադեպի գործով մեղադրյալ Շանթ Մանուկյանին կալանավորելու մասին միջնորդությունը մերժելու ընդհանուր իրավասության դատարանի որոշումը եւ գործն ուղարկել` առաջին ատյան` նոր քննության: Այս մասին «Փաստինֆո»-ն տեղեկացավ Շանթ Մանուկյանի պաշտպան Հրանտ Գեւորգյանից:
«Առաջին ատյանի դատարանը գտել էր, որ կալանավորման համար ողջամիտ կասկած չկա, իսկ Վերաքննիչ դատարանը ուղարկեց նոր քննության, ինչը սխալ եմ համարում: Վերաքննիչը քննում էր Առաջին ատյանի որոշման օրինականությունը, այն պետք է անփոփոխ թողներ Առաջին ատյանի նորոշումը, մինչդեռ առանց նոր ապացույցներ ներառելու կայացրեց նման որոշում, ինչի դեմ Վճռաբեկ բողոք կներկայացվի», - ասաց փաստաբանը:
Գեւորգյանը պնդում է, որ իր պաշտպանյալը զինված միջադեպին չի մասնակցել, այլ պարզապես օգնություն է ցուցաբերել. «Դատախազը բողոք էր ներկայացրել` հիմք ընդունելով Շանթի ցուցմունքը, որում Շանթն ասում էր, որ դուրս է եկել, մահացածներից մեկին տեսել է, օգնություն կանչել: Օգնության հասածները նրան տեղափոխել էին հիվանդանոց, իսկ Շանթն իր մեքենայով մյուս երկու տուժողներին էր տեղափոխել»:
Նրա խոսքով` հիմնավոր կասկածի վերաբերյալ ապացույցներ չկան, եւ այս կերպ գործին միայն արեստական հնչեղություն են հաղորդում:
Հիշեցնենք, որ զինված հարձակումը տեղի է ունեցել 2019 թվականի հունվարի լույս 29-ի գիշերը։ ԲՀԿ նախագահ Գագիկ Ծառուկյանի որդու կողմնակիցների զինված գնացել են «Պարտեզ» ռեստորանային համալիրի մոտ՝ պարզաբանում պահանջելու ավելի վաղ «Մուլտիտրանսսերվիս» ընկերությանը պատկանող ավտոտեխսպասարկման կենտրոնում տեղի ունեցած միջադեպի համար։ Ինչպես ավելի վաղ «Փաստինֆո»-ն տեղեկացրել է՝ Մելիք Մանուկյանի եղբոր որդին իր ընկերոջ հետ նշված ընկերության ավտոտեխսպասարկման կենտրոնում խնդրել է նորոգել ավտոմեքենայի անիվը, որտեղ տարբեր պատճառաբանություններով՝ աշխատակցի տեղում չլինելու, ապա նաեւ աշխատանքային ժամն ավարտված լինելու պատճառով հրաժարվել են սպասարկել։ Նշենք, որ նշված ավտոխսպասարկումն աշխատացնում են «Բարեց Վահրամ» անունով հայտնի Վահրամ Գրիգորյանն իր երկու եղբայրների հետ, ովքեր հայտնի են Գագիկ Ծառուկյանի միջավայրի հետ իրենց կապերով։ Առաջացել է վիճաբանություն, ինչը վերածվել է քաշքշոցի։ Մելիք Մանուկյանի զարմիկը հեռացել է՝ ուղեւորվելով ռեստորան, որտեղ հավաքված են եղել իրենց այլ հարազատներ եւ ընկերներ։ Բայց հարցը դրանով չի ավարտվել։
Ըստ մամուլում հրապարակված տեղեկությունների՝ քիչ անց տեխսպասարկման կենտրոնի աշխատակիցների համախոհներից մեկը զանգել եւ Մելիք Մանուկյանի քրոջ որդուն առաջարկել է հանդիպել Աբովյանի մարզադպրոցի մոտ, որտեղ չկան տեսանկարահանող սարքեր, ինչը Մելիք Մանուկյանի ազգականները մերժել են։ Ապա, տեղեկանալով, որ վերջիններս գտնվում են ռեստորանում, մի խումբ անձինք՝ նրանց թվում «Թաթ» մականունով հայտնի Արթուր Վարդանյանը, ով Ծառուկյանի մոտ աշխատել է որպես անվտանգության աշխատակից, «Բարեց Վահրամը» զինված, տարբեր մեքենաներով ուղեւորվել են այնտեղ։ Վիճաբանությունը վերածվել է զինված բախման, հնչել են կրակոցներ։ Արդյունքում՝ վիրավորվել է 8 անձ, որոնցից մեկը՝ Մելիք Մանուկյանի զարմիկի ընկերը, ստացած վնասվածքներից մահացել էր հիվանդանոցի ճանապարհին, ազգականը՝ 21-ամյա Ջիվան Հարությունյանը, գլխի շրջանում հրազենային վնասվածքով տեղափոխվել բժշկական կենտրոն, իսկ փետրվարի 10-ին արձանագրվել էր նրա մահը։ Վիրավորների թվում են նաեւ Մանուկյանի զարմիկները, տուժածներից միայն 2-ն են՝ Ծառուկյանի կողմնակիցները։ Գործով հարցաքննվել է նաու Ծառուկյանի որդին. Ըստ շրջանառվող վարկածի` նախքան զինված հարձակումը ավտոտեխսպասարկման կետի պատասխանատուները նախ խոսել են նրա հետ:
00:00:00
