Երեւանի Վերաքննիչ քրեական դատարանում այսօր շարունակվել է սփուռքահայ Արփի Մերասի և «Վելես» կազմակերպության նախագահ Մարինա Պողոսյանի վերաբերյալ քրեական գործով դատական նիստը։ Մարինա Պողոսյանին մեղադրանք է առաջադրվել այն բանի համար, որ նա ուրիշի գույքի առանձնապես խոշոր չափերի հափշտակություն կատարելու դիտավորությամբ ապօրինի, անհատույց եւ շահադիտական դրդումներով, յուրացման եղանակով հափշտակել է իրեն վստահված Արփի Մերասի՝ Երեւան քաղաքի Նալբանդյան 50 շենքի 42 հասցեում գտնվող բնակարանը, դրանում առկա գույքը եւ դրանց վաճառքից գոյացած 140 հազար ԱՄՆ դոլարը: Բնակարանի վաճառքը տեղի է ունեցել 2014 թվականին։ 2015թ-ին  Արփի Մերասը տեղեկանում  է, որ առանց իր համաձայնության Մարինա Պողոսյանը վաճառել է այդ բնակարանն ու ամբողջ հասույթն իրեն է պահել: Լուրն իմանալուց հետո, Արփի Մերասը քրեական գործ է հարուցում Մարինա Պողոսյանի դեմ։ Այսօրվա դատական նիստի ժամանակ, որը տեւեց շուրջ երկու ժամ Արփի Մերասի շահերի պաշտպան, փաստաբան Հրանտ Անանյանը ներկայացրեց դատական գործի նախապատմությունն ու հաստափոր քրեական գործի մանրամասները։ Դատական նիստի ընթացքում Հրանտ Անանյանին որոշ հարցեր ուղղեցին պաշտպանական կողմի ներկայացուցիչները։ Դատական նիստը ընդմիջվեց դատարանի ծանրաբեռնվածության պատճառով։ Հաջորդ դատական նիստը նշանակվեց մարտի 5-ին։ Նիստից հետո Irakanum.am-ի հետ զրույցում Արփի Մերասի շահերի պաշտպան Հրանտ Անանյանի հետ։ Վերջինս հայտնեց, որ քրեական գործում կան անհերքելի փաստեր, որոնք վկայում են, որ Մարինա Պողոսյանը խաբեությամբ է տիրացել Արփի Մերասի գույքին։ «Հարուցված գործի ընթացքում Արփի Մերասը հանդիպել է Մարինա Պողոսյանի հետ և դատարանի թույլտվությամբ զրույցը ձայնագրվել է: Զրույցի ընթացքում Մարինա Պողոսյանն ընդունել է, որ ապօրինաբար է վաճառել բնակարանն ու գումարը պահել իրեն»,- ասաց փաստաբանը։ Մարինա Պողոսյանը իրեն առաջադրված մեղադրանքը չի ընդունում։ Նշենք, որ մեղադրանքը հաստատվելու պարագայում Մարինա Պողոսյանին  սպառնում է  մինչեւ ութ տարվա ազատազրկում։ Irakanum.am