Արցախի Հանրապետության պետական նախարար Գրիգորի Մարտիրոսյանը հոկտեմբերի 7-ին աշխատանքային այց է կատարել Ասկերանի շրջանում գտնվող պետական եւ մասնավոր մի շարք տնտեսություններ:
Արցախի կառավարությունից հայտնում են, որ պետական նախարարը նախ այցելել է գյուղատնտեսության նախարարության ենթակայությամբ գործող «Տոհմային կայան» ՓԲԸ, որտեղ շրջայց է կատարել՝ ծանոթանալով ստեղծված պայմաններին: Նա մասնավորապես հետաքրքրվել է կաթի մթերման ծավալներով, տեղական նախրի բարելավման ծրագրի շրջանակում հորթերի, ցուլերի ու երինջների տրամադրմամբ, ինչպես նաեւ առկա խնդիրներով եւ արել մի շարք դիտարկումներ: Գ. Մարտիրոսյանի խոսքով՝ պետական միջոցներով արդի չափանիշներին համապատասխան կառուցված տոհմային կայանը հանրապետության անասնապահության զարգացման համար պետք է կարեւոր կենտրոն դառնա, որտեղ, օրինակ, գործնական գիտելիքներ ձեռք կբերեն բուհերի համապատասխան մասնագիտությունների գծով սովորող ուսանողները:
Պետնախարարի հաջորդ այցը եղել է «Գյուղի ու գյուղատնտեսության աջակցության» հիմնադրամի չորանոցային տնտեսություն, որտեղ ներկայացվել են բերքի ընդունման ծավալներն ու դրա օրական մշակման հնարավորությունները: Գ. Մարտիրոսյանը կարեւորել է չորանոցային տնտեսության գործառույթներն՝ ընդգծելով որ Արցախի գյուղատնտեսության մեջ որոշ նոր մշակաբույսերի մշակման գործում այն խթանում է հողօգտագործողների հետաքրքրությունը:
Պետական նախարարը այցելել է նաեւ մասնավոր միջոցներով հիմնվող այգի, որտեղ համապատասխան լիցենզավորում ստացած ընկերության կողմից պետական աջակցության ծրագրի շրջանակում իրականացվում են ոռոգման կաթիլային համակարգի տեղադրման աշխատանքներ: Գ. Մարտիրոսյանը նշել է, որ ծրագիրը մեծ պահանջարկ ու արդյունավետություն ունի եւ այն շարունակելու ու ընդլայնելու նպատակով գալիք տարվա պետական բյուջեով նախատեսվում է ավելի շատ միջոցներ հատկացնել:
Նշենք, որ պետական նախարարին այցի ընթացքում ուղեկցում էին ԱՀ գյուղատնտեսության նախարար Ժիրայր Միրզոյանը եւ «Գյուղի ու գյուղատնտեսության աջակցության» հիմնադրամի տնօրեն Տիգրան Ծատրյանը
