«Երրորդմասցի Լյովիկի» եւ նրա երկու ընկերների սպանության գործով հրապարակվել է դատավճիռը: Ամբաստանյալներ «Գաստիկ» մականունով հայտնի Վահան Հակոբյանը, «Ծըգլ» մականունով Սարգիս Գրիգորյանը եւ «Տլե» մականունով Սարգիս Հախանումյանը դատապարտվել են 18 տարվա ազատազրկման: Գործով պաշտպան Լուսինե Սահակյանը  ասաց, որ դատավճիռն ակնհայտ ապօրինի էր, պետք է արդարացման դատավճիռ կայացվեր եւ իրենք բողոքարկելու են առաջին ատյանի դատավճիռը: Նշենք, որ մեղադրող դատախազները իրենց ճառով միջնորդել էին ամբաստանյալներին դատապարտել ցմահ ազատազրկման: Ըստ մեղադրական եզրակացության՝ Վահան Հակոբյանը («Գաստիկ»), Սարգիս Հախանումյանն («Տլե») ու Սարգիս Գրիգորյանը («Ծգլ») նախնական համաձայնությամբ ապօրինի ձեռք են բերել եւ պահել զենք: 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը եւ Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգներից կրակահերթ են արձակել Լեւոն Ղազարյանի, Դրաստամատ Թադեւոսյանի եւ Մեսրոպ Նազարյանցի ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են: