Սիրիայի կառավարական ուժերը և նրանց աջակցող խմբերը ռազմական և մարդկության դեմ հանցագործություններ են կատարել գրոհայինների վերահսկողության տակ գտնվող մերձդամասկոսյան Արևելյան Ղուտա բնակավայրի շրջափակման ժամանակ: Lenta.ru-ի փոխանցմամբ՝ այս մասին ասվում է ՄԱԿ-ի՝ Սիրիայում մարդու իրավունքների խախտումների հետաքննության անկախ միջազգային հանձնաժողովի նոր զեկույցում: Դիտորդները մատնանշում են, որ Սիրիայի նախագահ Բաշար ալ-Ասադին հավատարիմ ուժերը Արևելյան Ղուտան շրջափակել էին 2013-ին, որից հետո անցել էին «պատերազմի միջնադարյան մեթոդների»: Նշվում է, որ «ժամանակակից պատմության ամենաերկարատև շրջափակման» ժամանակ նրանք հատուկ սովամահության էին ենթարկում տեղի 256 000 բնակչի՝ այդպիսով հյուծելով ինչպես գրոհայիններին, այնպես էլ խաղաղ բնակչությանը: Նման գործունեությունն անօրինական է: