«Ուժեղ Հայաստան» կուսակցության առաջնորդ և վարչապետի թեկնածու Սամվել Կարապետյանը հարց է ուղղել Հայաստանի գործարարներին՝ ինչու՞ են այս իշխանությունից վախեցած, էլ ի՞նչ ունեն կորցնելու, եթե արդեն հայրենիք ենք կորցրել ու կորցնում։
«Բոլոր բիզնեսմենները վախեցած են։ Ես չեմ հասկանում՝ ինչի՞ց են վախեցած։ Էլ դուք ի՞նչ ունեք կորցնելու, բացի ձեր «շղթաներից»,- ասել է Կարապետյանը՝ նկատի ունենալով իշխանության հետապնդումները՝ գործարարների նկատմամբ։
Չնայած այդ ամենին՝ բոլորին սթափեցնել, արթնացնել է պետք, նշել է Կարապետյանը։
«Բոլորին պետք է արթնացնենք։ Դա կոչվում է հայրենասիրություն։ Իրոք, մենք հիմա հայրենասեր մարդկանց կարիք ունենք»,- ասել է Սամվել Կարապետյանը։
Նա հավելել է՝ ինքն էլ շատ լավ, բարեկեցիկ կյանքով է ապրել, բայց երբ տեսել է՝ ինչ է կատարվում երկրում, ստանձնել է դա փոխելու պարտավորությունը։
«Ես տեսա, որ մեր երկիրը տանում են կործանման, թրքացման, ոչնչացնում են մեր ինքնությունը»,- ասել է Կարապետյանը։
Իշխանության այսօրվա գործելաոճին անդրադառնալով՝ Կարապետյանը նշել է՝ ամեն ինչ փոխվելու է։
«Սրանք ուզում են երգել-պարելով՝ երկիր կառավարել։ Սրանց միայն փորները կուշտ լինի, տակները՝ չոր, ու մի անորակ երաժշտություն միացնեն։ Տպավորություն են ստեղծում, թե երկրում ամեն ինչ շատ լավ է, մնացել է երգելն ու պարելը։ Բայց իրենք սխալվում են, մենք շատ համառ ենք, շատ ճիշտ ճանապարհի վրա ենք»,- ասել է Սամվել Կարապետյանը։
