ՌԴ ԱԳՆ ներկայացուցիչ Միխայիլ Կալուգինի հայտարարության համաձայն՝ 2023 թվականին Հայաստանը, Ադրբեջանը և Ռուսաստանը գրեթե ավարտին էին հասցրել «Մեղրիի երթուղու» շուրջ բանակցությունները։ Խոսքը վերաբերում է նախագծին, որը պետք է Հայաստանի հարավով ապահովեր կապ Ադրբեջանի և Նախիջևանի միջև՝ միաժամանակ վերագործարկելով տարածաշրջանային երկաթուղային հաղորդակցությունը։ Կալուգինի խոսքով՝ այդ գործընթացը իրականացվում էր եռակողմ աշխատանքային խմբի ձևաչափով և ներառում էր երկամյա բանակցություններ ու տեխնիկական համաձայնեցումներ։ Ռուս պաշտոնյան նշել է, որ ներկայում քննարկվող հայ-ամերիկյան «Թրամփի երթուղի» նախաձեռնությունը տարբերվում է նախորդ նախագծից, քանի որ այն չի ապահովում հայկական և ադրբեջանական երկաթուղային համակարգերի ամբողջական միացում։ Նա նաև ընդգծել է, որ եռակողմ ձևաչափի աշխատանքների սառեցումը տեղի է ունեցել Երևանի նախաձեռնությամբ։