ՀՀ փոխվարչապետ Տիգրան Ավինյանը հյուրընկալել է Գյուղատնտեսության զարգացման միջազգային հիմնադրամի (IFAD) ներկայացուցիչներին: Հիմնադրամի կողմից հանդիպմանը ներկա են եղել հիմնադրամի հայաստանյան ծրագրերի տարածաշրջանային ղեկավար Նաուֆել Թելահիգը, տեխնիկական գծով ղեկավար Պիտեր Քրիստենսենը, հիմնադրամի Հայաստանի գրասենյակի ղեկավար Աշոտ Վարդանյանը, ֆինանսական ղեկավար Վահե Հարությունյանը և մոնիթորինգի բաժնի ղեկավար Մարիա Մուրադյանը: Կառավարության կողմից ներկա են եղել նաև փոխվարչապետի գրասենյակի ղեկավար Սերժ Վարագ Սիսեռյանը և փոխվարչապետի օգնական Վիկտորյա Այդինյանը:
Քննարկվել են համագործակցության հեռանկարները, նախագծվող ծրագրերը, ներկայացվել կառավարության առաջնահերթությունները գյուղատնտեսության ոլորտում:
Ընդգծվել է, որ համագործակցության նպատակը մարզերում աղքատության հաղթահարումն է՝ փոքր ֆերմերներին ու խոցելի խմբերին օգնելու միջոցով:
Կողմերի միջև համագործակցության շրջանակներում հատկապես մեծ ուշադրություն է դարձվելու ոռոգման խնդրի կարգավորմանը, մարդկանց հմտությունների ու կարողությունների զարգացմանը, ինչպես նաև սոցիալական կապիտալի խթանմանը:
00:00:00
