Հայատյաց ռեժիմն արդեն հայտարարել է Երրորդ Հանրապետության փակման և Չորրորդ Հանրապետության ստեղծման մասին։ Այս մասին այսօր «Հայաստան» դաշինքի հանդիսավոր միջոցառման ժամանակ հայտարարել է ՀՅԴ Գերագույն մարմնի ներկայացուցիչ և «Հայաստան» դաշինքի անդամ Իշխան Սաղաթելյանը։
Նա հավելել է. «Դա խոստովանություն է։ Նա (նկատի ունի ՀՀ վարչապետ Նիկոլ Փաշինյանին - խմբ.) ոչնչացրեց Արցախը, իսկ հիմա պլանավորում է ոչնչացնել նաև Հայաստանի Հանրապետությունը։
Այն, ինչ նա անվանում է իրական Հայաստան, իրականում այն Հայաստանն է, որը պատկերացնում է Ադրբեջանը։ Մենք խոսում ենք մի պետության մասին, որի սահմանադրությունը թելադրում է Ադրբեջանը, մի պետության մասին, որը չունի եկեղեցի, պատմություն, ինքնություն, բանակ, որի ապագան կախված է Ալիևի և Էրդողանի քմահաճույքներից։
Եթե չարիքի իշխանությունը վերարտադրվի, այդ ամենը իրականություն կդառնա։ «Առջևում սոսկ ընտրություններ չեն, այլև գոյաբանական հարց։
Մեր նպատակն է կանխել գործող ռեժիմի վերարտադրությունը և փշրել զիջումների շղթան։
Հայաստանում չկա որևէ ուժ, որը կարող է դա անել միայնակ։ Ես ուղղակիորեն դիմում եմ ընդդիմադիր ուժերին։ Մենք ընդդիմության մեջ թիրախներ չունենք. ընդդիմադիր դաշտում մենք գործընկերներ ունենք այսօրվա և վաղվա պայքարի համար։
Մենք միայն մեկ թիրախ ունենք՝ գործող իշխանությունը։ Նույն մոտեցումն ենք ակնկալում նաև մյուս ընդդիմադիր ուժերից»,- նշել է Սաղաթելյանը։
Նա միաժամանակ դիմել է արտաքին գործող սուբյեկտներին. «Միակ սուբյեկտը, որը ձևավորում է իշխանությունը Հայաստանում, Հայաստանի քաղաքացին է։ Ցանկացած մայրաքաղաքի ցանկացած միջամտություն մեզ համար անընդունելի և դատապարտելի է»:
