Ելույթ ունենալով Թյուրքական պետությունների կազմակերպության արտաքին գործերի նախարարների խորհրդի ոչ պաշտոնական նիստում՝ Ադրբեջանի արտաքին գործերի նախարար Ջեյհուն Բայրամովը լուրջ մտահոգություն է հայտնել անվտանգության իրավիճակի վատթարացման, այդ թվում՝ Մերձավոր Արեւելքում վերջին ռազմական իրադարձությունների վերաբերյալ, եւ խստորեն դատապարտել է Թուրքիայի տարածքի հրթիռակոծումը, ինչպես նաեւ Նախիջեւանի վրա իրանական անօդաչու թռչող սարքերի գրոհները։

Նախարարը նաեւ անդրադարձել է ադրբեջանա-հայաստանյան խաղաղության գործընթացին՝ հաստատելով «Ադրբեջանի հանձնառությունը՝ կարգավորելու հարաբերությունները եւ հաստատելու Հարավային Կովկասում կայուն խաղաղություն 2025թ․ օգոստոսի 8-ի Վաշինգտոնյան գագաթաժողովից հետո, ինչպես նաեւ հաստատել է Ադրբեջանի նկատմամբ տարածքային պահանջների վերացման անհրաժեշտությունը, որոնք մնում են ամրագրված Հայաստանի սահմանադրության մեջ՝ հարաբերությունները լիովին կարգավորելու եւ կայուն խաղաղության հասնելու համար»։