Փետրվարի 10-ին, գողության դեպք է տեղի ունեցել Կոտայքի մարզում։ Ժամը 14։30-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Հրազդանի բաժին է զանգահարել Կոտայքի մարզի բնակիչ 59-ամյա Արմեն Դ․-ն և հայտնել, որ «Հրազդան-Ցեմենտ Քորփորեյշն» ՍՊԸ-ի գործարանի դռները, կնիքներն ու կողպեքները հայտնաբերել է կոտրված վիճակում, հաղորդում է Shamshyan.com—ը։

Ոստիկանության Հրազդանի բաժնի ծառայողները փաստական տվյալներ են ձեռք բերել, որ փետրվարի 7-ից 10-ն ընկած ժամանակահատվածում անհայտ անձը կամ անձինք դռան կողպեքները կոտրելու միջոցով ապօրինի մուտք են գործել Հրազդան քաղաքի Գործարանային 1 հասցեում գտնվող «Հրազդան-Ցեմենտ Քորփորեյշն» ՍՊԸ-ին պատկանող գործարանի տարածք և գողացել պղնձյա մալուխներ, վերամբարձ կռունկի հեռակառավարման վահանակի մեջ գտնվող պղնձյա դետալներ, էլեկտրական մետաղահատ՝ ընկերությանը պատճառելով գույքային վնաս։

Դեպքի փաստով ոստիկանության Հրազդանի բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Կոտայքի մարզային քննչական վարչություն, որտեղ դեպքի փաստով ՀՀ քրեական օրենսգրքի 254-րդ հոդվածի 2-րդ մասի 3-րդ և 4-րդ կետերի հատկանիշներով նախաձեռնվել է քրեական վարույթ։

Իրավապահները փաստական տվյալներ են ձեռք բերել, որ «Հրազդան-Ցեմենտ Քորփորեյշն» ՍՊԸ-ին պատկանող գործարանի հումքի ջարդման և գազաջրամատակարարման արտադրամասերից և լաբորատորիայից տարածքից գողություն կատարած անձինք մարզերից մեկի բնակիչներ 16 և 15-ամյա տղաներ են։ Փետրվարի 11-ին նրանք հայտնաբերվել, ձերբակալվել և տեղափոխվել են ոստիկանության Հրազդանի բաժին, որտեղից էլ ներկայացվել են ՀՀ Քննչական կոմիտեի Կոտայքի մարզային քննչական վարչություն։

Կայքի տեղեկություններով Արմեն Դ․-ն աշխատում է «Հրազդան-Ցեմենտ Քորփորեյշն» ՍՊԸ-ում, որպես անվտանգության պետ։