ՀՀ ներքին գործերի նախարարությունը հաստատում է «Ֆազ» մականունով հայտնի քրեական հեղինակություն Սերգեյ Գրիգորյանի սպանության մեջ կասկածվողներից մեկին Ռուսաստանում ձերբակալելու մասին լուրը:
«ՌԴ գործընկերները պատշաճ տեղեկացրել են ՀՀ իրավապահներին հետախուզվողի հայտնաբերման մասին»,- հայտնեցին ՆԳՆ-ից:
Ենթադրյալ կասկածյալի ձերբակալության մասին ավելի վաղ հայտնել էին հայկական լրատվամիջոցները:
Հիշեցնենք` 43-ամյա Սերգեյ Գրիգորյանին սպանեցին 2024 թվականի հունիսի 11-ին։ Հուլիսի 28-ին հայտնի դարձավ, որ սպանության համար ձերբակալվել է քրեական հեղինակություն «Չաղ Ռուստամը»՝ Ռուստամ Ստեփանյանը, որն ազատ արձակվեց 2025 թվականի փետրվարին։
2025 թվականի դեկտեմբերի 31-ին հայտնի դարձավ, որ Երևանի Կոմիտասի պողոտայի շենքերից մեկի բակում կրակոցներ են հնչել, կա վիրավոր։ Դեպքի վայրում հայտնաբերվել էր ռուսական համարանիշերով «Toyota Land Cruiser» մակնիշի ավտոմեքենա, որի դռան վրա եղել էր կրակոցի 9 հետք, իսկ դեպքի վայրում՝ 12 կրակված պարկուճ։
Փամփուշտներից 3-ը դիպել էին Ռուստամ Ստեփանյանի հորը։ Հունվարի 2-ին «Չաղ Ռուստամի» հայրը մահացավ։
