Բրիտանական Financial Times-ը գրում է, որ Ալյասկայում Թրամփի և Պուտինի միջև բանակցությունները ոչինչ չեն արել երկու նախագահներին մերձեցնելու համար և հանգեցրել են նրան, որ Թրամփը վերանայել է անձնական հարաբերությունները։
Ամերիկացի առաջնորդը կարծում էր, որ Ռուսաստանի համար սեղանին լավ առաջարկ կլինի, սակայն, երբ բոլոր ձեռքսեղմումներն ու ժպիտները տեսախցիկների առջև ավարտվել են սրահում, որտեղ նստած էին բանակցությունների ամերիկացի և ռուսաստանցի մասնակիցները, մթնոլորտը փոխվել է, հաղորդում է BBC-ն։
Պուտինը մերժել էր հրադադարի դիմաց ամերիկյան պատժամիջոցները մեղմացնելու գաղափարը և հայտարարել, որ պատերազմը կավարտվի միայն այն դեպքում, եթե Ուկրաինան համաձայնվի զիջել տարածքները։ Այնուհետև, ըստ Financial Times-ի, Պուտինը սկսել է իր պատմական շեղումներից մեկը՝ սկսելով Ռյուրիկից և Յարոսլավ Իմաստունից և անցնելով Բոգդան Խմելնիցկուն։ Ըստ Financial Times-ի՝ նա դրանով հիմնավորում էր այն թեզը, որ Ուկրաինան և Ռուսաստանը մեկ ազգ են։
Թրամփը դրան չէր սպասում։ Նա մի քանի անգամ բարձրացրել է ձայնը և նույնիսկ սպառնացել է լքել բանակցությունների սրահը, հիշում են FT-ի աղբյուրները։ Վերջիվերջո, հանդիպումը չեղարկվել է, չեղարկվել է նաև համագործակցության վերականգնման տնտեսական հեռանկարների քննարկման համար նախատեսված ճաշը, և նույնիսկ երկու նախագահների մամուլի ասուլիսը վերածվել է մամուլի կարճ ճեպազրույցի՝ առանց Թրամփին կամ Պուտինին հարցեր տալու որևէ հնարավորության։«Թրամփի «Ալյասկայում հիանալի և հաջող օրվա» մասին հայտարարությունը Ուկրաինայի նախագահ Զելենսկուն և եվրոպացի առաջնորդներին դրդեց շտապել Սպիտակ տուն և տարհամոզել նրան, որ Ուկրաինան Պուտինին չհանձնի։ Իրականում, այդ գագաթնաժողովը շրջադարձային կետ էր միանգամայն այլ իմաստով. դա Թրամփի և Պուտինի հարաբերությունների անկումն էր, որը հանգեցրեց Ուկրաինայի նկատմամբ ամերիկյան դիրքորոշման փոփոխության»,- եզրափակել է պարբերականը՝ հիմնվելով Վաշինգտոնի և Մոսկվայի մի քանի բարձրաստիճան աղբյուրների հետ զրույցների վրա։
