«Թրամփի երթուղու» իրականացումը լրացուցիչ խթան կհաղորդի Միջին միջանցքի նախաձեռնության հաջողությանը։ Այս մասին ադրբեջանական APA-ին տված հարցազրույցում ասել է Թյուրքական պետությունների կազմակերպության գլխավոր քարտուղար Կուբանիչբեկ Օմուրալիևը։
Նա, մասնավորապես, նշել է. «Միջազգային խաղաղության և բարգավաճման Թրամփի միջանցքի տեսլականը ներառում է Զանգեզուրում 43 կիլոմետրանոց ճանապարհի բացումը, որը կկապի Ադրբեջանը Նախիջևանի հետ և կկառավարվի ԱՄՆ-ի կողմից:
Այս ճանապարհը կկազմի Կենտրոնական Ասիայից Ադրբեջան, ապա՝ Թուրքիայով դեպի համաշխարհային շուկաներ տանող խոշոր առևտրային ուղու մի մասը: Մենք այս միջանցքն անվանում ենք Միջին միջանցք: Այն գտնվում է Արևելք-Արևմուտք առանցքի վրա՝ Հյուսիսային և Հարավային տրանսպորտային միջանցքների միջև, և առաջարկում է նշանակալի ռազմավարական առավելություններ երկու այլընտրանքային երթուղիների համեմատ։
Տարածաշրջանում համապարփակ խաղաղության և կայունության հաստատումը, ինչպես նաև «Թրամփի երթուղու» իրականացումը լրացուցիչ խթան կհաղորդեն Միջին միջանցքի նախաձեռնության հաջողությանը»:
Նշվում է նաև, որ Օմուրալիևն ընդգծել է Միացյալ Նահանգների հատուկ դերը Ադրբեջանի և Հայաստանի միջև խաղաղության գործընթացում և ողջունել Վաշինգտոնում ԱՄՆ նախագահի միջնորդությամբ ստորագրված համատեղ հայտարարությունը, ինչպես նաև Խաղաղության և միջպետական հարաբերությունների հաստատման մասին համաձայնագրի նախաստորագրումը։
«Այս կարևոր քայլը ցույց է տալիս կողմերի վճռականությունը՝ թողնել հակամարտության ժառանգությունը և կառուցել համագործակցության ու փոխադարձ հարգանքի վրա հիմնված ապագա։ Մենք այս զարգացումը համարում ենք պատմական շրջադարձային կետ ոչ միայն Ադրբեջանի և Հայաստանի, այլև ամբողջ Հարավային Կովկասի և դրանից դուրս, որը հարթում է կայուն խաղաղության, կայունության և բարգավաճման ճանապարհը»,-ասել է նա:
